.jpg?width=200&height=94 "Sea View Accommodation")
.jpg?width=200&height=94 "Traditional Tastes")
.jpg?width=200&height=94 "Community")
.jpg?width=200&height=94 "History & Heritage")
Fokus op amateur tuiniers en hulle tuine
"A Garden is not necessarily something that should impress others who know nothing about gardens, or those that do, for that matter. It's personal.” Kurt Wilkinson.
Gedurende die uitgerekte grendeltyd, toe inwoners van oraloor maar teen wil en dank moes vasbyt en deurdruk, het baie van hulle vir die eerste keer ontdek hoe bevredigend dit is om te plant en te kyk hoe daardie saadjies of steggies groei en floreer. Ander amateur tuiniers het weer die vreugde van tuinmaak herontdek of hulle tuine na die volgende vlak geneem.
Hoe dit ookal sy, tuine - of dit nou groot tuine of piepklein tuintjies of potplant tuine is - tuinmaak is nou, so wil dit voorkom, stewig gevestig as een van talle inwoners se gunsteling tydverdrywe.
Oor tuiniers en hulle tuine
Geen wonder dat die konsep van “ope tuine” ook gewild geraak het nie. Op Bredasdorp het die “ope tuine” toer deur die dorp hierdie jaar ook weer - ten spyte van die eendeweer wat gedreig het om die geleentheid te verongeluk - 'n stewige getal tuin kykers opgelewer. Die geleentheid word jaarliks ten bate AACL - die liggaam wat omsien na verwaarloosde en huislose diere - georganiseer.
Op Napier het die “oop tuine”, gekoppel met 'n tuin kompetisie, ook weer na jare se sluimering, vlam gevat. Die fokus was hier egter nie soseer op “baastuine” en voortreflike tuinboutegnieke nie, maar op die genot wat gewone mense daagliks put uit “tuinmaak”, of dit nou groentekruie- of blomtuine is of 'n bietjie van alles.
Tyd vir pryse uitdeel en steggies uitruil
Op Dinsdagaand, 30 November het deelnemers bymekaar gekom om te verneem wie “gewen” het en om hulle belonings en pryse in ontvangs geneem. Etienne Kriel wat ook jare gelede sy eie kwekery as 'n belangstelling of stokperdjie begin het, het die doel van die kompetisie en ope tuin inisiatief saamgevat deur na Kurt Wilkinson se aanhaling hierbo te verwys. Dit het in die eerste plek gegaan oor passie en individualiteit wat die tuiniers getoon en aan die dag gelê het.
Daar was groot tuine en klein tuine, inheemse tuine en formele tuine. Tuine met blomme en tuine met kruie en groente wat sy aan sy meegedring het vir aandag in die akkers. Rose is ook uitgesonder as almal se gunstelinge en uit dit wat die tuiniers met die beoordelaars en besoekers gedeel het, kon 'n mens ook aflei dat dit hulle nie noodwendig baie geld gekos het nie, want met steggies, gedeelde saad, groen vingers en baie entoesiasme, kan jy berge versit.
