Die NG gemeentekoor is in ongeveer 1950 onder die bekwame leiding van mev. Van Niekerk van Stanford, wat ook die orrel bespeel het, gestig. Deur die jare was die gemeentekoor daar om tydens eredienste of by spesiale geleenthede op te tree. Koorlede en koorleiers van formaat het deur die jare daartoe bygedra dat die NG gemeentekoor van Gansbaai lof en waardering ontvang het vir hul skitterende sang en optredes.
Die feeslied waarmee die gemeente die Here dank vir 70 geseënde jare, is deur Aletta Lochner geskep. Sy is die afgelope paar jaar die koorleier en Annelene Reinke is die begeleier. Die koor is baie aktief betrokke en tree ook by ander kerke op. Onlangs het hulle ‘n musiekblyspel aangebied wat van hoogstaande gehalte was en so bygedra tot die fondsinsameling vir die herstel van die kerk se horlosie. Met die feesnaweek van 21 tot 23 November speel hulle ‘n groot rol in die gemeentekonsert, die erediens en die Kerssangdiens die Sondagaand.