Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Met die voorwendsel dat hulle goue juweliersware wil verkoop, het 2 mans Dinsdag, 12 September 2017 toegang verkry tot Gansbaai se juwelierswinkel.
Die eienaar en goudsmid, Johan van Zyl het gesien dat dit nie egte goud is nie en hulle meegedeel dat hy nie belangstel nie.
Hulle het gemaak asof hulle wou uitstap, maar een van die mans het omgedraai, Johan aan sy keel gegryp en gewurg. Die ander man het ‘n vuurwapen in sy sy gedruk.
‘n Derde man het by hulle aangesluit en juweliersware uit die kaste begin stroop.
Twee lede van die publiek het onverwags ingestap. Die rowers het hulle, Johan en sy vrou na die werkskamer gedwing, waar hulle rug teen rug vasgebind is. Die rowers het daarna op die vlug geslaan.
Johan het daarin geslaag om die alarm te geaktiveer en hulp te ontbied.
Die rowers word beskryf as: een stewig geboude man van sowat 1,7 meter lank. Die ander 2 is skraalgeboude mans. Al drie het donker klere aangehad, waarvan een ‘n bruinerige baadjie.
Sp.kapt Danie Rautenbach sê dit is nie duidelik of ‘n voertuig op die 3 verdagtes gewag het nie. “Ons het goeie forensiese bewyse gekry wat met die ondersoek sal help,” het hy gesê.
Sp.kapt Rautenbach het dit beklemtoon dat misdaadtonele onaangeraak gelaat moet word om suksesvolle ondersoeke te verseker.
Hy het ook ‘n beroep op eienaars van besighede gedoen om te verseker dat soveel as moontlik veiligheidsmaatreëls getref moet word en dat alarmstelsels en veral kameras in plek moet wees.
