Die historiese ou Dorpskombuis hoekgebou se eienaars is deur die Munisipaliteit gedagvaar om op 17 Februarie voor die Addisionele Hof (Munisipale Hof) te verskyn. Hul het egter nie opgedaag nie en gepaste geregtelike optredes het reeds in aanvang geneem. Dit volg op verskeie munisipale versoeke om die gebou te herstel óf 'n nuwe ontwikkeling daar te stel. Die gebou is bouvallig, ingeneem deur ongemagtigde betreders, skep 'n slaapplek vir haweloses en is gevolglik ook 'n gesondheids- en sosiale probleem. Die bouval doen esteties ook afbreek aan die hele gebied. "Die munisipaliteit is al sedert die sluiting van die suksesvolle Dorpskombuis bakkery en pastei besigheid besig om die situasie aan te spreek.

Ongelukkig moes dit deur die Landdroshof geskied maar met die koms van die nuwe Addisionele Hof op 1 November 2015 het die omstandighede verander. Dit het 'n nuwe dimensie gegee aan die toepassing van wette wat praktyke soos ongemagtigde bou aktiwiteite en oortreding van die grondgebruik-reëls aanspreek," het mnr Francois Myburgh, Areabestuurder van die Overstrandse Munisipaliteit se Gansbaai Administrasie, gesê. Die Dorpskombuis-saak is tans sub judice en die munisipaliteit mag dit nie bespreek nie.

Ontwikkelaars en eienaars wat historiese geboue wil herbou óf omskep loop hul egter gereeld vas teen Erfenis Wes-Kaap. Enige gebou ouer as 60 jaar mag nie verander word sonder hul goedkeuring nie. In die geval van die Dorpskombuis mag die hoekgedeelte van die gebou se gewel en dakvorm nie afgebreek word nie. Die dakplate mag wel verwyder word maar die onafgewerkte dun populierpale wat as balke dien, moet glo bly. Die sinkdak is vrot en moontlik ook die balke.

Francois de Jongh

Zoom

Zoom