Gansbaai Courant

Blog: Plaas-Smokkelnes Skok

Published: 01 April 2016
By:Francois de Jongh

Twee Chinese mans en ‘n bekende sakeman van Gansbaai, Johan Rademeyer, is Saterdagmiddag gearresteer toe daar op ‘n perlemoen droogfabriek toegeslaan is. Die polisie het inligting ontvang dat daar vermoedelik perlemoen gestoor word op die plaas Groenkloof kortby die Pearly Beach R43 kruisweg op pad na Baardskeerdersbos. Gansbaai polisie en speurtak sowel as die Departement van Seevisserye (DAFF) se beamptes het in ‘n gesamentlike operasie toegeslaan. In een van die vier huise op die plaas is daar ‘n perlemoen-droogfasiliteit gevind.

Al die vensters was toegeplak met foelie en toerusting wat kenmerkend is vir die droog van perlemoen, is gevind. So ook 2300 gedroogde perlemoen, sommige nog op droograkke. Twee Chinese mans is op die perseel gearresteer en daar moet nog bepaal word of hulle verblyfreg in Suid-Afrika het. Een van die plaaseienaars, Johan Rademeyer (61), is ook gearresteer aangesien 2 groot rubberbote op sy perseel gestoor is. ’n Vierde verdagte sal moontlik binnekort gearresteer word. Perlemoen word gedroog deur dit eers in ‘n perserveermiddel te kook en daarna vir 10 dae op droograkke voor waaiers te plaas. In China word die proses omgekeer deur dit weer te behandel. Daarna word dit weer vars, amper soos droë vrugte wat opgekook word.

Die swartmarkprys is R3000 per kg en ‘n derde van die perlemoen se gewig word verloor in die droogmaakproses. Die waarde van die perlemoen wat gekonfiskeer is, is dus sowat R600 000 en dié van die toerusting en bote meer as R300 000. Al drie die beskuldiges het reeds in Bredasdorp se hof verskyn en word tans aangehou in die Buffeljags gevangenis buite Swellendam. Die saak is uitgestel tot Dinsdag 22 Maart vir borgtog profiele.

Francois de Jongh

Recent Posts

Lojale SAPD-lid se s...
Published: 18 August 2017
By: Gansbaai Courant

Polisiemanne is verslae na die skielike dood van &...

Meester-skrywers
Published: 18 August 2017
By: Gansbaai Courant

Gansbaai se twee getoë Strandvelders en ook k...

Vermiste op see stee...
Published: 18 August 2017
By: Gansbaai Courant

 ‘n Man, vermoedelik van Mosselbaai, wa...

Vyf droom... en een ...
Published: 18 August 2017
By: Gansbaai Courant

Vyf finaliste het oor ‘n splinternuwe motor ...