Gansbaai Courant

Blog: Kanonkop se Voortrekkers

Published: 06 May 2016
By:Hardus Botha

Die Kanonkop Voortrekkers (Gr 5-span) van Protea Hoogte in Brackenfell het Gansbaai en omgewing onlangs besoek.

Die offisier wat hulle vergesel het, is Petrie Le Roux, seun van ‘n ou bekende Gansbaaier, René Le Roux, wat in 2015 verhuis het, terwyl sy haar woning in Franskraal behou het. Sy het ‘n “program” met besienswaardighede vir Petrie en sy spannetjie uitgewerk en die kinders het die verskeie besoeke terdeë geniet.

By Strandveld Museum in Franskraal het Jan (Pyp) Fourie, bekende skrywer van die Strandveld, hulle teruggevoer na die ou dae van koolstowe en die speel van ou boerekonsertinas, plus vanselfsprekend die geskiedenis van die HMS Birkenhead Troepeskip.

Daarna het hulle Coenie en Christa van Dyk in De Kelders se mini-voorstellings van 7de Laan en Coenie se plaas besoek, asook Albert en Marie Potgieter se bekende Feetjietuin.

In die Great White House het hulle hulself verkyk aan die enorme walvisskelet teen die plafon en het ook na ‘n praatjie oor walvisse en grootwithaaie geluister.

Volgende op die lys was die African Penguin and Seabird Sanctuary (APSS) in Kleinbaai waar hulle gewys is hoe pikkewyne gevoer word.

Die span het ook besoek by Danger Point afgelê en was gefassineer oor die monument met die name van oorledenes tydens die sinking van die HMS Birkenhead Troepeskip, asook die Birkenheadrots. Daar het hulle ook van die opdrag, “Vroue en kinders eerste” se oorsprong gehoor wat daar begin het.

In Kleinbaai kon hulle ook na Wilfred Chivell se boot, Dream Catcher kyk en foto’s neem.

Daarna kon hulle vir oulaas voor die winter heerlik by Uilkraalsmond gaan swem.

Sondag is afgesluit met ‘n wandeling deur die Groot Melkhout Wandelpad in Franskraal. Daar moes hulle die verskeidenheid van plante, insekte en diere waarneem, met Mariaan Burger van Franskraal wat hulle touwys gemaak het.

Petrie sê hulle kuier hier is goed deur Alexander opgesom: “Dit was die lekkerste kamp waarop ek al ooit was!”

Kanonkop Voortrekkers se Gr 5’s bedank graag die inwoners en instansies wat hulle besoek hier aangenaam en interesant gemaak het, asook vir hul wonderlike gasvryheid.                                       

Hardus Botha

Recent Posts

Lojale SAPD-lid se s...
Published: 18 August 2017
By: Gansbaai Courant

Polisiemanne is verslae na die skielike dood van &...

Meester-skrywers
Published: 18 August 2017
By: Gansbaai Courant

Gansbaai se twee getoë Strandvelders en ook k...

Vermiste op see stee...
Published: 18 August 2017
By: Gansbaai Courant

 ‘n Man, vermoedelik van Mosselbaai, wa...

Vyf droom... en een ...
Published: 18 August 2017
By: Gansbaai Courant

Vyf finaliste het oor ‘n splinternuwe motor ...