Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
“My broers, julle moet baie bly wees wanneer allerlei beproewings oor julle kom, want, soos julle weet, as julle geloof die toets deurstaan het, stel dit julle in staat om te volhard.
En die volharding moet end-uit volgehou word sodat julle tot volle geestelike rypheid kan kom, sonder enige tekortkoming.” (Jak. 1:2 -4)
Verlede week is ek by die begrafnis van my skoonmoeder, en my seun Theon, doen die lofrede. Hy vertel vir ons met passie wat hy by sy ouma geleer het. As kind het sy baie swaarkry-tye beleef en as volwassene baie geliefdes aan die dood afgestaan. Haar lewensfilosofie was altyd:
“My seun, die moeilike dinge maak jou net sterker en die goeie dinge maak jou beter!”
Die Woord van GOD sê presies dieselfde, is dit nie só nie? As jy deur moeilike tye gaan moet jy geduldig bly en vertrou dat GOD jou net sterker sal maak. Lees hierdie teks hierbo uit Jakobus sommer twee of drie keer en maak dit jou lewensfilosofie: GOD laat toe dat swaarkry oor ons pad kom sodat ons geloof sterker kan word. Hoekom moet ons geloof sterker word? Sodat ons tot volle geestelike rypheid kan kom, sonder enige tekortkoming!
Jesus het ons kom red uit die mag van die ewige dood. Ons wat glo weet verseker dat ons nou ’n hemelse woonplek het. Maar intussen kan ons nie net terugsit en wag dat ons doodgaan nie. Die lewe gebeur elke dag om ons. Ons gaan deur goeie tye en ons ervaar hartseer dinge. Ons sien hoe mense rondom ons swaarkry terwyl ander oënskynlik geen moeilikheid ervaar nie. Te midde van hierdie wipplank-ry van die lewe, moet ons weet: GOD laat alles ten goede meewerk vir dié wat Hom liefhet! (Rom 8:28) Alles is ook nie net altyd goed in die lewe nie. Nêrens in die Bybel lees ek dat GOD aan ons net lekker belowe het nie. Maar ek weet dat Hy belowe het dat Hy ons nooit sal verlaat nie en dat Hy te alle tye langs ons sal wees en deur die Heilige Gees in ons sal bly! (Jes. 41:7; 2 Kor. 4:9; Heb. 13:6)
Gaan sit vir ’n oomblik stil en kyk terug op jou lewe. Jy sal raaksien dat die swaarkry ook vir jou sterker gemaak het. ’n Atleet wat wil presteer weet dat hy harder moet oefen en sy liggaam deur moeilike fases moet laat gaan om fikser te word. As gelowige moet jy ook swaarkry om sterker te word. As jy dan goeie tye ervaar en ek glo daar is baie in jou lewe, leef dankbaar en weet: Ek word beter! Sterker en beter!
