Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Na aanleiding van die gereelde klagtes rakende perlemoenstropery wat deurgaans ontvang word, het die Kaapstadse SAPD se Watervleuel Sondagnag, 23 Julie 2017 optrede in die omgewing van Dyer Eiland geloods.
Om 02:00 Maandagoggend is 3 rubberbote aangekeer en deursoek, met 5 arrestasies wat uitgevoer is. Twee van die rubberbote was in die omgewing van Dyer Eiland met onwettige perlemoen aan boord en is gekonfiskeer. Die 3de boot is in Kleinbaai hawe aangekeer en daar is bevind dat dit nie aan SAMSA se veiligheidswette voldoen nie en dus nie seevaardig is nie en is ook gekonfiskeer.
In Kleinbaai hawe is Christian Carelse (35) en Cyril Marthinus (50) op aanklag van die oortreding van SAMSA se seevaardigheidswette gearresteer. Altwee het Dinsdag, 25 Julie 2017 in die Hermanushof verskyn.
Die ander twee bote, wat by Dyer Eiland aangekeer is met onwettige perlemoen aanboord, is ook gekonfiskeer en die skippers en bemanning is gearresteer. Johannes Louw (36), Anver Davids (26) en Gerald Visser (27) het Dinsdag, 25 Julie 2017 in die Bredasdorphof vir die besit van onwettige perlemoen, asook die oortreding van die Seevisserye Wet verskyn. Die eienaar van een van die rubberbote is ook vir die oortreding van Handelseevaartwetgewing aangekla.
Inbraak in Franskraal
‘n Verdagte, Adam Abrahams (26), het Dinsdag, 25 Julie 2017 in die Hermanushof op aanklag van inbraak gedurende die naweek verskyn. Abrahams is gearresteer nadat vingerafdrukke gelig is en borg is teengestaan as gevolg van vorige soortgelyke oortredings.
Inbraak in Kleinbaai
Vakansiegangers is verlede naweek onverhoeds betrap met ‘n inbraak in Kabeljoustraat, Kleinbaai.
‘n Verdagte, Andre Anthony (27), het diefwering voor een van die vensters oopgebreek terwyl die inwoners tuis was.
Met goeie speurwerk deur AO Vermeulen en konst Mpondo is Anthony vir die besit van gesteelde eiendom gearresteer. Anthony het Dinsdag, 25 Julie 2017 in die Hermanushof verskyn.
Identifisering van gesteelde eiendom
Gesteelde eiendom is by Gansbaai SAPD beskikbaar vir uitkenning deur die wettige eienaars. Onder andere is daar ‘n Silwer Sansui TV, ‘n wit mikrogolfoond, ‘n LG “surrounding sound speakers” en ‘n Aiwa hoëtroustel met luidsprekers. Die goedere is in Masakhane gevind en 2 verdagtes, Mlondolosi Mgadasie (32) en Afrika Mkheto (23) het reeds gedurende April vanjaar in die Hermanushof op aanklag vir die besit van gesteelde goedere verskyn.
Altwee verskyn weer vandag, 27 Julie 2017 in die hof.
