Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Vrywillige leerders van Laerskool Gansbaai en Gansbaai Primêr het Internasionale Kusskoonmaakdag benut om hul kragte saam te snoer om sodoende te wys dat hulle omgee vir die bedreigde natuur.
Christoff Longland, koördineerder van die ekspedisie, vertel dat die idee was om die leerders te laat deelneem aan die skoonmaak van die kuslyn, maar ook om ‘n bewustheid te skep van hoeveel rommel op die kuslyn gegooi en uitgespoel word.
Die leerders het die strandgedeelte vanaf Kleinbaai hawe tot by die T-aansluiting na Dangerpoint skoongemaak.
“Hoe meer rommel hulle opgetel het, hoe meer opgewonde het hulle geraak,” vertel Christoff. “Hulle is in groepies van twee opgedeel, met een wat alles wat opgetel word, moes aanteken sodat die inligting later op ‘n databasis geplaas kon word.”
Die leerders het veral ‘n groot hoeveelheid sigaretstompies opgetel, asook vislyne, koeldrankbottels en koeldrankbottelproppies.
Christoff is baie dankbaar teenoor Grootbos Privaat Natuurreservaat vir die vervoer, asook die twee onderwyseresse wat hom bygestaan het: Marlette Longland en me Sauls, maar dit is veral die leerders wat van die dag ‘n sukses gemaak het met hul bereidwilligheid om te help.
