Gansbaai Courant

Blog: Wykskomiteelid geskors

Published: 23 May 2013
By:Hardus Botha

'n Wykskomiteelid, Siphiwe Kololo, is na afloop van die onlangse onwettige Masakhane-betogings en verwante probleme gearresteer en daarna op borgtog vrygelaat. Intussen is Kololo ook as Wykskomiteelid deur die Speaker van die Raad, rdl Anton Coetsee, geskors. Kololo is verlede week saam met twee ander Masakhane-inwoners, Thembile Gwele en Sebenzile Wotyi op aanklagte van openbare geweld en 'n onwettige optog gearresteer. Al drie het op Vrydag, 17 Mei 2013 in die hof ver-skyn. Kololo en Gwele is op borgtog vrygelaat, maar onder die voorwaarde dat hulle onder huisarres bly. Wotyi is borgtog geweier en word steeds aangehou, aangesien hy alreeds vir 'n bestaande saak op borgtog uit is. Kololo se skorsing berus op die feit dat hy die gedragskode vir wykskomiteelede oortree het deur by ‘n optog teen die munisipaliteit betrokke te wees. Wykskomiteelede is aan dieselfde gedragskode as raadslede onderworpe. Rdl Coetsee het Kololo meegedeel dat die Speaker van die Overstrand Munisipaliteit ‘n ander persoon in sy plek moet aanwys. Indien dit nie gedoen word nie, sal die organisasie nie verdere sittingsregte op die Wykskomitees hê nie en sal ‘n ander organisasie, wat die volgende grootste steun tydens die verkiesing van Wykskomiteelede gekry het, aangewys word.
Geen sodanige nominasie is vanaf die Masakhane Inwonersvereniging ontvang nie en gevolglik is die setel van die organisasie tydens ‘n vergadering van die wykskomitee wat gehou is op 15 Mei 2013, verbeur. Die protesaksies vanuit Masakhane het op 23 April 2013 met 'n wettige en vreedsame optog na Gansbaai munisipalekantore en die polisiestasie begin.
Tydens dié optog is 'n versoekskrif (deur Kololo onderteken) met 13 eise, waarvan slegs enkeles oor dienslewering handel, aan die Overstrandse Uitvoerende Burgemeester, rdl Nicolette BothaGuthrie, oorhandig.
Rdl Botha-Guthrie het binne 5 dae breedvoerig op die versoekskrif geantwoord, maar die organiseerders was klaarblyklik nie daarmee tevrede nie. Dit het waarskynlik aanleiding tot die onlangse chaos gegee.
Groot skade, sowat R350,000, is deur 'n kleinerige groepie inwoners (±100) aangerig. Aangesien die munisipaliteit van oordeel was dat die openbare geriewe wat beskadig is, die versperring van strate en die strooi van huishoudelike vullis nie die toedoen van die meerderheid van inwoners van Masakhane was nie, is daar besluit om laasgenoemde groep inwoners wat reeds besig was met opruimingsaksies te ondersteun en stabiliteit in die woongebied te bring. Dit is alles gedoen in ‘n poging om te verhoed dat onskuldige inwoners deur die oproerige optrede benadeel word en met die same-werking van hierdie inwoners is die netheid en voorkoms van die woongebied binne die bestek van ‘n kort tydjie tot normaal herstel. Dit blyk dat die probleem in Masakhane nou iets van die verlede is.   
Hardus Botha

Recent Posts

Otto Bylmoord hervat
Published: 01 May 2014
By: Francois de Jongh

Die staat se laaste twee getuies in die bylmoor...

Fraternal ontbyt
Published: 01 May 2014
By: Hardus Botha

Gansbaai Ministers Fraternal het onlangs, onder le...

VLV Nuus
Published: 01 May 2014
By: Gansbaai Courant

Vertrou dat almal  'n baie geseënde Paas...

DA Shows Its Multi C...
Published: 01 May 2014
By: SSMA Fanie Krige

The misconception that the Democratic Alliance is ...