Opgewonde kleuters van De Kleine Gansies Kleuterskool het ‘n opwindende besoek deur Gansbaai Biblioteek ontvang. Op Donderdag, 31 Julie 2014 het Edna van der Linde van Gansbaai Biblioteek ‘n welwillendheidsbesoek aan die kleuterskool gebring. Sy het ‘n storie aan hulle voorgelees, wat aandagtig deur hulle gevolg is. Hulle het die storie oor Flossie die Flamink terdeë geniet.

Daarna het Edna die dienste wat deur die biblioteek gelewer word, op kleutervlak aan hulle verduidelik, met kleuters wat groot-oog gesit en luister het. Kleuters kan natuurlik nooit sonder ‘n lekkerny of geskenkie besoek word nie: elke kind het dus ‘n welkome geskenkpakkie ontvang. Hulle was baie opgewonde oor die borspeldjies, inkleurprente en plakkers wat hulle ontvang het. “Verskeie ouers het ons bedank vir hierdie besoek aan hul kinders se kleuterskooltjie, wat ‘n groot sukses was,” vertel Edna. “Ons be-oog om van die ander kleuterskole in die area binne die volgende paar maande ook te besoek.”

Gansbaai Biblioteek se vriendelike en behulpsame personeel bestaan uit Sharman Geldenhuys (Bibliotekaris), Zelda Fourie, Edna van der Linde en Busisiwe Mtatase.

Hulle gerieflike bedryfsure is Maandae tot Vrydae vanaf 09:30 tot 17:30 en hulle kan by 028-384-8300 vir navrae gekontak word.

Zoom