“Ek sal jou red uit die mag van slegte mense, jou bevry van dié wat op geweld uit is.”(Jer. 15:21)

“Al die konings van die aarde sal U loof, HERE, wanneer hulle u woord hoor, hulle sal sing oor wat die HERE gedoen het, want die mag van die HERE is groot.” ( Ps 138:4,5)

Só kan dit nie langer aangaan nie! Die geweld en misdade wat in  ons land elke dag plaasvind veroorsaak ’n paniek en vrees onder die Suid-Afrikaanse volk wat mense se denke en uitkyk op die lewe verlam. Statistieke wys dat daar 32 boere in die afgelope maand vermoor is. Wat staan ons te doen? Kom ons gaan na die Woord van GOD en vra raad.

GOD se Woord is duidelik. “Ons weet dat ons aan GOD behoort en dat die hele sondige wêreld in die mag van die duiwel is.” (1Joh 5:19)  As GOD se kinders weet ons dat ons nie langer in die mag van die sonde leef nie – Jesus het die mag van die sonde verbreek met Sy volmaakte offer aan die kruis. Aan die ander kant leef die wêreld nog in die mag van die duiwel, of die sonde. Reeds in die Ou Testament het GOD sy volk verseker dat Hy alleen wonderbare mag besit om hulle te red van vreemde volke en van dié wat op geweld uit is. (Jer. 15:21) As GOD se volk begin om Sy woord aan die nasies te verkondig en te praat oor alles wat die HERE gedoen het, sal die konings van die aarde begin om die HERE te loof, want sê Psalm 138:5 “Die mag van die HERE is groot!”

As christene moet ons dag en nag GOD loof vir Sy wonderbaarlike mag en waar ons gaan moet ons in die Naam van Jesus hierdie mag van GOD proklameer. Spreek dit hard uit oor elke situasie waarin jy mag wees. Jy staan onder die heerskappy van Jesus en nie meer onder die mag van die sonde nie. “Hy het ons uit die mag van die duisternis weggeruk en ons onder die heerskappy gestel van sy Seun wat Hy lief het.” (Kol. 1:3) Verbreek die mag van die dwelmhandelaars wat ons jeug probeer vasvang in hulle mag. Hou aan om die mag van die misdadigers te verbreek in die Naam van ons HERE, Jesus Christus. Ons moet opnuut glo dat Jesus alle mag besit oorlewe en dood. Onthou wat Hy vir Maria gesê het toe Hy Lasarus uit die dood opgewek het: “Jesus sê toe vir haar: “Het Ek nie vir jou gesê as jy glo, sal jy die openbaring van die wonderbaarlike mag van GOD sien nie?” (Joh 11:40)

GOD sal ons land red uit die mag van die misdadigers en moordenaars. Glo dit. Sê dit.

Hy kan jou vandag red uit die mag van verslawing aan drank, sigarette en pornografie. Begin om op te staan in die mag van Sy Naam en laat GOD weer beheer neem oor ons hele land!