Tydens die pasafgelope Cape Floral Kingdom Ekspo, is die nuwe fynbosspesie wat ontdek, spesiaal uitgestal. Die spesie is van die familie Fabaceae en is na die ontdekker daarvan, Nicky van Berkel van Knysna, vernoem: die Psoralea vanberkelae.

Nicky het die spesie in die Robberg Kuskorridor tussen Robberg en Harkerville op die Kaapse Tuinroete ontdek. Tussen Oktober en Februarie is die plant vol klein en fyn blou blommetjies. Nicky, ‘n kundige op hierdie gebied, het die eerste fotos van die plant in Augustus 2011 geneem. “Ek het nie geweet dat die spesie baie spesiaal is nie, behalwe dat ek dit nog nooit voorheen gesien het nie,” het sy gesê.

Gedurende Februarie vanjaar, het prof Charles Stirton van die Botaniese Departement aan die Universiteit van Kaapstad, die area besoek. Hy het bevestig dat dit wel ‘n nuwe spesie is wat ontdek is. Nicky het gesê sy voel nederig omdat die spesie na haar vernoem is. “Ek hoop net dat die ontdekking van nuwe spesies mense sal help om nog meer intens bewus te raak van die belangrikheid van bewaring,” het sy beskeie gesê.

Die amptelike bekendmaking van die nuwe spesie is eers onlangs deur Robberg Coastal Corridor Landowner’s’ Association aangekondig. Hierdie organisasie werk nou saam met Sanparke en CapeNature in die Robberg Natuurreservaat. “Wie weet hoeveel ander nuwe spesies is daar buite wat wag om ontdek te word,” het die brosjure mee afgesluit.

Hardus Botha

Zoom