Overstrand Medical Response (OMR) se paramedici moes die afgelope naweek behoorlik bontstaan om verskeie ernstige ongelukke en lewensbedreigende mediese gevalle te hanteer.

"Ek het vanaf Vrydagaand tot vanoggend nog net 5 uur slaap ingekry," het Riaan Buys, Maandagoggend gesê. Daar was 4 ongelukke in Gansbaai en twee in Bredasdorp wat deur OMR se Cassie Carstens, Riaan en Steven Breytenbach hanteer is. Verder is 'n hartaanvalpasiënt asook 'n beroertepasiënt gestabiliseer en na die Medi Clinic in Hermanus geneem.

Die eerste Gansbaai voorval was 'n bakkie wat op Saterdag om 14:40 op die draai net anderkant die Uilkraalmondbrug in die rigting van Pearly Beach gerol het. Vyf mans van die Kaapse Vlakte is op die toneel vir ernstige beenfrakture en rugbeserings behandel. Terwyl hul nog op die toneel was, is hulle uitgeroep na 'n ongeluk waar 'n 15-jarige seun op 'n plaas naby Franskraal Karavaanpark van 'n motorfiets geval het. Die seun het 'n rugwerwel gekraak en is na Hermanus Medi Clinic geneem. Saterdagnag om 02:15 is hulle uitgeroep na die getypoel by Perlemoenbaai. 'n Motor het daar op die rotse beland en uitgebrand. Die polisie het mnr Pieter Bekker op sy regtersy op die rotse daar naby kry lê. "Sy regterbeen onderkant die knie het ernstige graad 3 brandwonde opgedoen. Hy is gestabiliseer en na Hermanus geneem en oorgeplaas na Worcester," het Riaan gesê. Bekker is getroud met Elsa le Roux, skoonheidsterapeut.

Volgens Buys was daar Sondagoggend om 11:00 in Afsaalstraat, Pearly Beach nog 'n motorfietsongeluk wat hulle nie kon bywoon nie omdat hulle met 'n ander noodgeval besig was.

Francois de Jongh

Zoom