Kleinbaai See- en Teekring se dames het hulle jaar op Woensdag, 4 Februarie 2015 met ‘n gesellige “soortvan” modeparade afgeskop. Nadat hulle gebruiklike huishoudelike sake afgehandel is, het die gasvrouens versoek dat elke tafel ‘n model moes kies, asook persone om die model aan te trek.

“Die nodige keuses is gemaak en die spesifieke kledingstuk wat geskep moes word, is aangekondig - ‘n trourok vir elke model wat van toiletpapier aanmekaargesit is!” vertel Maryna Rossouw. Nou-ja, só ‘n versoek mag vir die manne na die onmoontlike klink, maar vir die dames is dit ‘n Gr 1 takie wat uitgevoer moes word - met geen tekort aan kreatiwiteit nie. Natuurlik is die hele proses onder groot gelag uitgevoer, maar binne 5 minute het die “toiletpapier-ontwerpers” die modelle soos ware bruide geklee.

“Dit was ‘n baie vermaaklike en woelige vyf minute soos wat ontwerpers die toiletpapier om die modelle gedraai het,” sê Maryna. Sy sê vir afronding is die tafelversierings, helderpienk Bougainvillia, as trouruikers gebruik.

Na ‘n behoorlike en statige vertoning van bruidsgewade, wat nie juis stewig om die lywe gesit het nie, moes ‘n wenner aangewys word. Twee bruide het gewen, aangesien die keuse tussen hulle te moeilik was. Maryna sê, soos gebruiklik vir die afgelope 26 jaar, is die gesellige oggend met iets te ete en te drinke afgesluit en met die warmte van Februarie in gedagte, is vrugtesap en slaai aangebied. Die welkome ligte reëntjie kon ook nie afbreek doen aan ‘n baie vermaaklike oggend nie.

Alle Kleinbaai-dames is welkom om aan te sluit en om elke eerste Woensdag van die maand om 10:00 in die Overberg Boothengelklub se saal saam met die Kleinbaai See- en Teekring se dames te vergader en te kuier.

Vir navrae kan Maryna Rossouw by 028-384-1358 gekontak word.

Hardus Botha

Zoom