“Wat die verrassingsaspek nog groter gemaak het, is dat ek en my eggenote, Angeline, gedurende ons gesamentlike diensjare van 71 jaar by Telkom gereeld vir kompetisies ingeskryf het, sonder dat ons ooit iets gewen het,” vertel ‘n opgewonde en dankbare Gerhard Roux van Franskraal wat gedurende Oktober sy 70ste verjaardag sal vier. Hy is die gelukkige wenner van Arrie Nel Apteekgroep, waarvan Gansbaai Apteek deel vorm, se splinternuwe Toyota Etios 1.5ltr, ‘n “geskenk” wat sekerlik nie te versmaai is nie. “Ek bedank graag die Arrie Nel Apteekgroep, vir Fanie Viljoen en sy personeel vir vriendelike diens en Du Plessis Du Toit van Riversdal Toyota vir hierdie eer wat my te beurt geval het,” sê Gerhard. Die kompetisie het op 15 Januarie 2015 begin, met 52 motors wat weekliks gewen moet word. Elke maand, om en by die 24ste van daardie maand, word 4 wenners vir die maand getrek en deelnemers moet sorg dat hulle gedurende daardie tyd by hul fone is of dis neusie verby. Inskrywings word toegelaat vir elke R100 se aankope en wenners ontvang hul motors by die apteek waar die aankope gedoen is. Meer inligting kan op Arrie Nel Apteekgroep se webtuiste by www.arrienelapteekgroep.co.za gekry word en Gansbaai Apteek se kontaknommer vir verdere navrae is 028-384-0637.

Hardus Botha

Zoom