Gansbaai Courant

Blog: Stanford Hills se Wyne

Published: 06 August 2015
By:Hardus Botha

Gansbaai Wynproegilde se onlangse byeenkoms in die gewilde Great White House was weer ‘n wenner en is uitstekend bygewoon. Die knap aanbieder was Peter Kastner van Stanford Hills Estate - sommer net om die draai van Gansbaai af en hy is deur sy eggenote, Jami vergesel. Peter se wyne is deurgaans met ‘n baie sterk silwer deur die lede en gaste beoordeel, met drie wat goue toekennings ontvang het. Peter staan dus nie verniet bekend as “Piet Pinotage” nie.

Die wyne wat te proe aangebied is, is Rosé (2015), Sauvignon Blanc (2014), Veldfire (2014), Jacksons Pinotage (2013), Shiraz (2012) en ‘n Pinotage Grappa as “nagereg”. Laasgenoemde is as ‘n sagte Grappa beskryf (met ‘n alkoholinhoud van 43%) - pure witblits.

Die “Veldfire” is ‘n uitstekende versnit van Shiraz en Pinotage. Op die vraag van hoe lank wyn stil behoort te lê, het Peter met die tong in die kies geantwoord: “Die langste wat ‘n mens wyn moet laat stil lê is op die motor se agtersitplek vanaf die bottelstoor tot by die huis!” Peter vertel dat hy letterlik in die diep kant ingegooi is. Hy is in Monrovia in Wes-Afrika gebore en het aanvanklik Hotelbestuur in Oostenryk studeer, maar besluit dit is nie vir hom nie. 

Daarna is hy na Hermanus en uiteindelik op 1 April 2005 na Stanford Hills, waar hy ernstig vanaf voedsel na wynbou oorgeskakel het. Stanford Hills Estate op die walle van die Kleinrivier is ‘n ware gesins-kuierplek met ‘n verskeidenheid van aktiwiteite wat vir ontspanning aangebied word. Hulle gewilde restaurant het sitplek vir sowat 80 mense, terwyl hulle netjiese akkommodasie geriewe vir sowat 34 mense het. Chef Derek Lowe van die Great White House het hom goed van sy taak gekwyt: Stuffed Chicken Thigh met velerlei lekkernye en groente, asook ‘n smaaklike nagereg met room daarna.

Vir navrae rakende Gansbaai Wynproegilde kan Amanda de Vries by 028-388-0708 of 082-577-6920 geskakel word, of stuur ‘n e-pos aan haar by info@franskraalbandb.co.za.

Hardus Botha

Recent Posts

Lojale SAPD-lid se s...
Published: 18 August 2017
By: Gansbaai Courant

Polisiemanne is verslae na die skielike dood van &...

Meester-skrywers
Published: 18 August 2017
By: Gansbaai Courant

Gansbaai se twee getoë Strandvelders en ook k...

Vermiste op see stee...
Published: 18 August 2017
By: Gansbaai Courant

 ‘n Man, vermoedelik van Mosselbaai, wa...

Vyf droom... en een ...
Published: 18 August 2017
By: Gansbaai Courant

Vyf finaliste het oor ‘n splinternuwe motor ...