“Ek voel nogal trots op my twee galjoene wat ek gevang het,” vertel Bertha du Toit van Pearly Beach Hengel- en Ontspanningsklub (rots- en strandhengel). Bertha se een galjoen het 1.3kg geweeg en die ander een 1.65kg. Sy het ook die damesafdeling gewen en het 3de in die klub geëindig. Sy sê die vorige maand se hengelkompetisie is deur ‘n dame, Alida Strydom gewen en dit was die eerste keer in die klub se geskiedenis wat ‘n dame die voortou geneem het.

Die klub spog reeds geruime tyd met hulle volwaardige dames-hengelspan wat hulself die “Galjoen Diva's” noem. Van hulle is Bertha du Toit, Liezl Myburgh, Colleen de Kock, Karen Hoogendijk, Joanne Bester en Jaenette De Kock.

Philip Fourie (Hengelkaptein) laat weet soos volg oor die onlangse kompetisie: "Geluk aan Ewan Swart met sy eerste plek, swaartste vis (Steenbras, 5.95kg) en swaartse sak (6.45kg). Tweede was Tony Hoogendijk met onder andere ‘n mooi Galjoen (2.3kg). Derde Bertha du Toit, vierde Christopher Botha en vyfde Denton Bauermeister. Bertha wen ook die dameskompetisie en Wessel Fourie die Seniors. ‘n Rekord van 67 hengelaars het ingeskryf en 14 het 19 visse van 26.25kg ingeweeg. “Baie dankie aan al die borge en Tony en Karen Hoogendijk vir die ekstra pryse,” sê Philip. “Dankie ook aan tannie Carla en Frances en haar span wat in die kombuis met heerlike bykosse vir die braai reggestaan het.” Hy bedank ook vir Mary-Anne Bernhardt, Suzette Van Wyk en Nikita Bernhardt wat in die kroeg moes bontstaan, asook Louw vir die lekker musiek en die braaiers, veral Stephan De Kock, wat vir meer as 100 mense moes vleisbraai. “Lisa Muller het pragtige foto’s geneem, met Marle en Johann wat dit op die posters gedruk het.” Die klub se volgende kompetisie is op 12 September en Goodwood Hengelklub kom teen hulle hengel.

Hardus Botha

Zoom