“Die Gansbaai-tak van die DA het ‘n aktiewe deelname aan die jaarlikse Loslitdag gehad,” vertel rdl Riana de Coning. “‘n Groepie lede het eers die stap deur die hoofstraat meegemaak, met skenking van nie-bederfbare produkte, waarna hulle na die Strandlopertjieskool in Blompark gegaan het.” Hulle het ingespring en die stoepgedeelte van die skool verfraai deur helder geometriese patrone teen die mure te verf.  

Riana sê die DA lede het soos ‘n ge-oliede masjien saamgewerk en die taak in ‘n japtrap afgehandel. Sy het op die geometriese patrone besluit omdat dit ook ingespan kan word om die kleuters se persepsie van vorms  te verbeter. Dit kan ook handig gebruik word as hulpmiddel in kleurherkenning, asook in die ontwikkeling van wiskundige begrippe en om ‘n gesonde basis vir toekomstige wiskundige beginsels vas te lê. Volgende aan die beurt is om ander skole in die dorp en in Masakhane ook te verfraai.

Hardus Botha

 DA-lede is hard aan die verf by Strandlopertjieskool in Blompark

Zoom

Zoom