Jami-Lee Saunders (22), ‘n junior sjef van Grootbos Foundation, is onlangs as “Jong Sjef van die Jaar 2015” aangewys - en dit sonder enige formele opleiding óf kwalifikasies.

Hierdie is die derde Gala-jaar waartydens sjefs van die jaar vir toekennings in aanmerking kom, maar dit is die eerste jaar waarby “jong sjefs” ingesluit was - en hierdie jong dame stap in die 1ste plek met die toekenning, ‘n trofee en ‘n sertifikaat weg! Sowat 75 groot en top-restaurante word jaarliks vir hierdie toekenings geselekteer. Ingesluit by die toekenning is ook ‘n wonderlike oorsese geleentheid vir haar. Jami-Lee word volgende jaar na Duitsland, Frankryk en Switserland gestuur om ‘n tydperk se kosbare ondervinding in ‘n top-restaurant in elk van hierdie lande op te doen.

Jamie-Lee is op 16 Junie 1993 gebore, maar is sedert sewe-jarige ouderdom ‘n Gansbaaier, nadat haar ouers, Kelly en Glenda Saunders van Tableview hierheen verhuis het. “Toe ons hierheen verhuis het, kon ek nie ‘n woord Afrikaans verstaan of praat nie, maar ek moes dit vinnig aanleer,” vertel Jamie-Lee. Sy deurloop haar laerskooljare in Laerskool Gansbaai, waarna sy haar matriek in 2011 aan die Overberg Hoërskool (koshuis) in Caledon verwerf. Jami-Lee het ná skool sowat 2 jaar in Florida spandeer. Grootbos Foundation het haar ‘n skrale 2 jaar gelede in diens geneem en haar die geleentheid gebied om as beginner-sjef vir hulle te werk. Tans is sy hulle “Commi Pastry” sjef.

“In kort beteken dit ek fokus op verleidelike soetgoedjies,” vertel sy met ‘n skalkse glimlag. “Dit is so dat ek oor geen formele opleiding of  kwalifikasies beskik nie, maar alles wat ek weet, het ek by my fantastiese senior sjefs hier by Grootbos geleer.” Sy bedank graag elkeen van hulle, maar veral die Bestuurder/Hoofsjef, Ben Conradie vir die groot geleentheid vir deeglike opleiding en ervaring wat sy deurloop het. “Alhoewel my passie in voedsel geleë is, is ek baie, baie lief vir diertjies en my blyplek is vol daarvan!”         

Hardus Botha

Zoom