Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
“Dit was ‘n aand van groot trots en groot dankie-sê”, vertel Philip Fourie, Hengelkaptein van Pearly Beach Rots- en Strand Hengelklub. “Trots op elke hengelaar wat die jaar deelgeneem het, trots op die top-presteerders en trots op die Algehele Klubkampioen vir 2015, Deon Strydom, asook alle ander top-wenners.”
Die geleentheid was die klub se Jaareind- en Prysuitdelingsfunksie. Die res van die toppresteerders was Alida Strydom as Dames Kampioen, Hanco Strydom as Junior Kampioen en Robert Pace as Senior Kampioen. Deon het ook die grootste Kablejou (14.7kg) en die grootste Galjoen (2.6kg) vir die jaar ingeweeg. Ewan Swart het die grootste Steenbras (5.95kg) ingeweeg en Johan de Kock die Swaarste Sak (30.45kg). Hannes Smuts eindig as 2de Algehele Hengelkampioen en Barry Muller as 3de Algehele Hengelkampioen. Barry wen ook die nuwe Blouskuittrofee vir die meeste Galjoen (7) vir die jaar. Hierdie nuwe trofee is die inisiatief van Johan Saayman, ter ere van André Mohr wat vroeër vanjaar oorlede is.
Die nuwe Steenbrastrofee is ook ter ere van André. “GROOT dankie aan al ons borge wat so ruimhartig gegee het en so baie dinge moontlik gemaak het om die gees in die klub te ‘boost’” sê Philip. “Dankie ook aan elke helper, klubpersoneellid, fotograwe (Lisa Muller en Piet Swart), hengelkomiteelede en elkeen wat ‘n rol gespeel het gedurende hierdie ongelooflike lekker en suksesvolle hengeljaar.” Tydens die funksie het die meeste gaste saamgespeel en blou en wit aangetrek vir die tema: “Finding Nemo”, al het ‘n paar ouens hulle Nemo gemis, maar darem hulle meerminne huis toe geneem. Laastens spog Philip so ‘n bietjie met die klub se hengelstatistieke vir die afgelope jaar, “om te wys hoe suksesvol ons was”. In totaal was daar 766 (381 mans, 104 dames, 129 seniors, 19 juniors en 124 besoekers) wat vir hengelkompetisies ingeskryf het. ‘n Totaal van 173 van hierdie hengelaars het vis ingeweeg. Hulle totale aantal spesies het 295 beloop: 147 x Kabeljou, 100 x Galjoen, 10 x Steenbras, 24 x Hottentot en 4 x Elf. Ander spesies (10) het bestaan uit Belman, Kolstert, Jan Bruin, Zebra en Grunter. Die totale gewig vir die jaar was 631.2kg.
“Baie dankie aan Gansbaai Courant vir julle betrokkenheid en gereelde beriggewing en ‘n Geseënde Kersgety en ‘n Voorspoedige Nuwe Jaar word julle toegewens,” sê Philip.
Hardus Botha
