“Op 17 Februarie 2016 het die Gansbaai Belastingbetalers- en Inwonersvereniging (GBIV) hulle eerste komiteevergadering vir die jaar gehou,” vertel voorsitter Nico Naudé. “Die nuwe bestuur is reeds tydens die Algemene Jaarvergadering gedurende November 2015 verkies.”

Die Bestuur, wat slaggereed is vir 2016, is: Nico Naudé (voorsitter), Ivy van Huysteen (visie-voorsitter) en Lida Naudé (sekretaris/penningmeester), asook twee addisionele lede, Maretha Geldenhuys en Phillip Rozenkranz (afwesig met fotosessie). Nico sê daar is van verskeie sake kennis geneem tydens hulle vergadering, wat ook deur lede van die gemeenskap bygewoon is.

Van die sake sluit onder andere die volgende in: sluitingsdatum vir besware teen die eiendoms-waardasierol - 29 Februarie 2016; verpligte vertoon van straatnommers; konsepwysiging aan die verordeninge vir die aanhou van honde en katte; bespreking van die vordering van en Motlekar se gebrek aan stof- en waaisand beheer by die Foutainhill ontwikkeling; redes vir die vertraging van die Gansbaai Stormwaterprojek; OVK kiesersregistrasie is weer op 9 en 10 April 2016.

“Lede van Gansbaai gemeenskap word aangemoedig om teen ‘n skrale R30 per persoon per jaar by die GBIV aan te sluit en deel te word van die vrae en antwoorde wat ons gemeenskap kwel,” sê Nico. “Ons deel ook graag in dienslewering aan ons gemeenskap en die skep van ‘n veilige, gesonde en voorspoedige Gansbaai.”

Nico Naudé kan vir navrae by 082-903-5038 gekontak word, of stuur ‘n e-pos aan hom by lida.naude@gmail.com.

Hardus Botha

Zoom