“Stoffel Rossouw, een van Pearly Beach se baanbrekers, kruidenier en brandstofjoggie het besluit om die tuig na 47 jaar diens neer te lê,” sê Nelia Koekemoer (Puren) van Pearly Beach Kafee. “Stoffel is op 1 Mei 1969 deur wyle mnr Jerry Puren as handlanger by mnr Puren se bouonderneming aangestel.” Sy sê teen Desember daardie jaar het Stoffel ‘n voorsmakie gekry van hoe die res van sy lewe as werker van die Puren-familie sou verloop. Tydens vakansieseisoene in volle  swang, kon die winkelpersoneel op hul eie nie hond haar-af maak nie en Stoffel moes inspring om in die winkel te help. Sy vriendelike en humoristiese geaardheid het tot gevolg gehad dat hy nooit weer terug is na die bouafdeling nie. Reeds op jeugdige ouderdom en sonder vreeslike akademiese kwalifikasies, het Stoffel ontluik as seker die bekendste winkelier in hierdie geweste. “Tye was beslis anders in daardie dae,” vertel Stoffel. “So kon ‘n mens ‘n brood koop vir 9 sent en die koerant was slegs 5 sent.” Hy sê die salaris was ook maar aan die skraps kant en hy het “presies R6.80 per week ontvang.” Voor die uitbreidings wat in die oord plaasgevind het, het hy nog sekere pligte in die ou karavaanpark ook gehad. “Stoffel wonder sommer so hardop of die jong manne van vandag die pas sou kon volhou,” sê Nelia. Gedurende sy loopbaan het Stoffel vele hoogtepunte bereik, maar die aangenaamste van alles vir hom, was die interaksie met kliënte. “Hier was destyds seker net sowat 50 huise in Pearly Beach,” sê Nelia. “Na die afsterwe van mnr Puren het sy dogter die besigheid oorgekoop en Stoffel was die enigste personeellid wat deel van die koopprys was,” spot Nelia. Jan en Nelia het tydens ‘n geselligheid by Stasie 7 in Pearly Beach amptelik van Stoffel afskeid geneem. Jan het Stoffel geloof vir sy lojaliteit, en het ook sy diepgewortelde leefstyl en integriteit beklemtoon. “Die personeel is dit almal eens dat Stoffel ‘n groot leemte gaan laat en die sowat 50 gaste het almal saamgestem dat Stoffel sy uittrede verdien en dit terdeë moet geniet.”

Hardus Botha

Zoom