“Die komende produksie-seisoen gaan beslis nié business as usual wees nie, al is ons besig om stelselmatig te herstel van die skade wat El-Niño ons berokken het. Die landbou het ‘n nuwe sakeplan nodig, een wat ʼn nuwe visie vir die landbousektor daar stel, maar ook ʼn plan wat die klimaat gaan skep om deure oop te maak en beleggers na die sektor gaan lok. Niemand wil belê in ʼn bedryf wat nie duidelik kan uitspel wat sy toekomsplanne is nie,” het mnr Cornie Swart, President van Agri Wes-Kaap, tydens Agri Wes-Kaap se 2016-Jaar-kongres gesê wat op 28 Julie buite Worcester aangebied is.

Mnr Swart het gesê so ʼn sakeplan gaan ʼn duidelike omdraai- en groeistrategie moet uitspel. “Daarom het ons uiters kundige en gewigte sprekers betrek om die landbousektor in die Wes-Kaap te help om oor so ʼn strategie te besin,” het mnr Swart gesê.

Die Wes-Kaap se Minister van Landbou, mnr Alan Winde, het in sy toespraak ook na tegnologie verwys en gesê die landbou moet besin oor hoe die wêreld se volgende biljoen mense gevoed gaan word binne die raamwerk en konteks van die vierde industriële revolusie. “Die manier hoe Afrika hierdie revolusie gaan aanpak, gaan krities wees. Ouer produsente gaan tegnologiese mentors nodig hê op dieselfde manier as waarop jongboere landboumentors gaan nodig hê.”

Mnr Winde het gesê lande wat na Suid-Afrika kyk, sien presies wat ons sien: mis-daad, ʼn onderwysstelsel wat nie aangespreek word nie, nul persent groei en ʼn totale gebrek aan leierskap. “As dit nie vir die landbou was nie, sou ons nou in ‘n resessie gewees het.”

Tydens die kongres is mnr Cornie Swart tot President en mnr Koot Claassen tot Vise-President van Agri Wes-Kaap herkies.

Zoom

Zoom