R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
‘n Besoekersboek vol inskrywings wat spreek van lof en dankbaarheid – dit is waarmee die ses vroue wat verantwoordelik was vir die Fynbos- uitstalling by Groeneweide na afloop van die Funky Fynbos Fees, kan spog.
Inteendeel, Sylvie Agenbach wat aan die stuur van die grootse projek gestaan het, moes gaan blaaie leen, omdat die besoekersboek vol was.
Sylvie het reeds in Augustus begin om die drie pikkewyne te maak wat jaarliks deel is van die projek.
Twee weke gelede het haar vyf helpers, waaronder die fynboskenner Aletta Groenewald, begin om die plantmateriaal bymekaar te maak.
Dit is harde werk, want fynbos is beslis meer “bos” as “fyn” op die plukker se hand.
Daar was komiese oomblikke so tussen die plukkery deur, soos Diana Nortman, wat gewys het hoe vinnig ‘n mens uit ‘n bos in ‘n pad in kan spring as daar ‘n spinnekop tussen die plante bespeur word.
Die ander fynboshelpers was Emsie Joubert, Linda en Carel Meyer en Lenie Bezuidenhout.
Sylvie vertel dat daar besonder baie buitelandse besoekers was.
Sy rig ook ‘n groepie van sowat twaalf dansers af – almal Blompark-kinders wat spontaan en heeltemal gratis by haar weekklas in die saaltjie langs die kerk kom aansluit het.
Hulle het tydens die fees in die tent, buite die tent en in die Groeneweide Restaurant gedans.
Hulle Kaapse Klopse en Whaka-whaka dansstyl het die besoekers se harte warm laat klop vir hierdie sielvolle dansers.
Academia se Marimba Band het feesgangers ook in hul spore laat stilstaan. Dat ons gemeenskap oorloop van talent, is gewis.
Tagtig koorlede van die Beaumont Skool in Somerset-Wes, het deel uitgemaak van Saterdagoggend se luisterryke program by Groeneweide.
