Sowat twee maande gelede is The Farmlady’s Shed se deure stil-stil by die Barn House sentrum oopgestoot. Hierdie netjiese dekor-cum-koffiewinkel het reeds ‘n gewilde kuierplek vir veral ons dorp se vroue geword.

Die spreekwoord sê dat jy nie ‘n persoon op sy baadjie moet takseer nie. Die eienares, Tiekie van Biljon is ‘n toonbeeld  van vroulikheid.

Jy sou nooit sê dat sy 16 jaar lank ‘n boervrou – ja, boervrou – nie ‘n boer se vrou nie - in die Kimberley-omgewing was nie.  Sy het met beeste, boerbokke en wild geboer.

Haar man Hannes, is as fnansiële direkteur in Bredasdorp by die Kaap Agulhas Munisipaliteit aangestel en die egpaar het besluit dat ‘n pendelhuwelik glad nie vir hulle gaan werk nie.

Tiekie het huisvrou geword in hulle Franskraal vakansiehuis, maar hierdie werf was veels te klein vir die Kimberley-boervrou.

Soos wat almal weet, knou die droogte landwyd en soos wat ‘n boervrou nou maar is, het Tiekie se vindingryke boervrouvriendinne begin planne maak om hul mans finansieel by te staan.  Die boervrouens het koppe bymekaar gesit en vandag is Tiekie se Farmlady’s Shed die afsetpunt vir haar vriendinne se kreatiewe handwerk. Tiekie se dekorwinkel spog met handgemaakte leerartikels soos wat min mense nog gesien het, kwaliteit sierkussings, allerlei naaldwerk en kunswerke deur Karien van Vuuren, Nicky Blignaut en Maria M.

Vars gebakte kleinkoekies en beskuit van die plaas af en allerlei ingemaakte produkte, maak Tiekie se winkel ‘n gewilde stopplek.

Tiekie is ‘n voorslag met vleisgeregte en vertel dat die kaaskoek ‘n “moet” is om te proe.

Sy en haar regterhand, Christine Jefferies, maak ook deesdae snoepborde op bestelling.

Hierdie “boervrouskuur” is beslis ‘n besoek werd.

Zoom

Zoom