Die finale optrek en  "boet" van visnette deur die Pelagiese vissersvloot, het vanjaar heelwat vroeër as ander jare plaasgevind.

Daar is vanjaar teen die einde van Oktober op ‘n vroeër datum besluit op grond van visskaarstes en gereelde gure weersomstandighede.

Die bedrywighede met die visnette in Gansbaai hawe lok gereeld heelwat belangstellendes - veral deur besoekers. Die “boet” van die visnette, wat vir die vang van anjovis en sardyn gebruik word, beteken bloot die herstel daarvan na ‘n jaar se gebruik.

Spesiale breipenne is vroeër jare, voordat daar met meganisering begin is, gebruik om die nette mee te brei of nette met groot "mase" (gate) te herstel.

Nou het ‘n rusperiode vir die vissermanne aangebreek waartydens terselfdertyd herstel- en verfwerk aan die bote gedoen word. Die visvangseisoen open weer gedurende die laaste week van Januarie 2017.

Ockie Viljoen en sy bemanning van Silwer Snapper het op Vrydag, 18 November 2016 die “boet” van hulle visnette gefinaliseer en was besig om dit op ‘n vragmotor te laai - ‘n enorme taak waar hyserkatrolle en mannekrag gebruik word.

“Ons is lekker vroeg vanjaar klaar en kan nou ons rustyd ingaan,” het Ockie gesê.

Vanjaar se Vissermans-Dankseggingsdiens vind Sondag, 11 Desember 2016 om 19:00 in Gansbaai hawe plaas en almal is welkom om dit by te woon. Die gebruiklike Vissersmans-Verootmoedigingsdiens sal Sondag, 15 Januarie 2017 ook om 19:00 in Gansbaai hawe gehou word. Navrae: Johan van Dyk by 083 537 7013. 

Zoom

Zoom