Saartjie Baardman hang op die oseaan terwyl die dag in pienk gehul, groet.  Die ligte van die patrollieboot neem allerlei bekoorlike foto-oomblikke aan van skemer na donker.

Dit was ‘n week van vlamme en rook en hel in die Kaap.  Enorme verliese. Enorme tragedie met helikopters wat in ‘n droë Kaap water uit ons damme opslurp.

Ons brandweermanne verrig heldedaad op heldedaad.

Terwyl onderwysers praat oor opvoeding en dissipline en ouerverantwoordelikheid, is ouers besig om hul kinders te klee, te voed en te inspireer vir ‘n nuwe jaar.

Die jongklomp is meerendeels opgewonde.  Hulle verstaan nie altyd die knorrigheid van ‘n pa of die verergdheid van ‘n ma nie, maar die lewe draai maar om geld.  Daarsonder kan jy níks en die frustrasie en uitdaging om aan al die behoeftes te voldoen is groot!  ‘To make ends meet’ soos die Engelse sê, is ‘n kuns der kunste.

Waar ons mense Sondag bymekaarkom vir verootmoediging en seën op ‘n werksjaar wat voorlê, bid ons vir meelewendheid, verdraagsaamheid en vergifnis tussen mekaar.

Nou nie dat ek sê jy hoef die skelm – wat inwoners terloops sommer op die naam ken – se dade oorsien nie.

Nee.

Maar neem hande en bid vir mekaar vir leiding en voorspoed en groot, groot genade.

Mag 2017 goed wees vir jou!

Marinda van der Walt

Zoom

Zoom