Gansbaai Academia spog vanjaar met ‘n allemintige 290 Gr 8 leerders nadat die skool Dinsdag, 10 Januarie 2017 vir die nuwe akademiese jaar geopen het.

Vanaf Woensdag het hulle ‘n stewige oriëntasieprogram gevolg, waartydens die leerders ingelig is oor die “Sharkie Brand” en tradisies wat die skool in plek het.

Vrydag, 13 Januarie 2017 het die groep die geleentheid gehad om aan al die verskillende baan- en velditems vir atletiek deel te neem. Die beste presteerders sal Vrydag, 20 Januarie 2017 aan die skool se interhuis-atletiekbyeenkoms deelneem.

Gedurende die Vrydagmiddag en –aand van die oriëntasie-program was dit die tradisionele inlywingseremonie waar “Nemos” Sharkies geword het. Tydens die funksie het leerders kaskenades saam met die matriekraad en registeronderwysers gehad en ook geleer om in groepe saam te werk. Leierskap is ook bespreek en daar is sommer lekker konsert gehou. Teen die einde van die verrigtinge het die spesiale inlywingseremonie begin.

Mnr Tommy Wilson, skoolhoof, asook die hoofleiers van die skool, het elke leerder se kersie aangesteek en hulle offisieel as Sharkies ingelyf.

‘n Groot hoeveelheid ouers het ook die spesiale seremonie  bygewoon.

Zoom

Zoom

Zoom