Die Hardebaarde ken hulle feite en sal seker nie in hierdie bydrae  belangstel nie, dis egter gerig op die manne wat òf begin hengel òf al moedeloos raak omdat die vis maar skaars bly. Ek wil ‘n paar goed uitwys wat, indien dit toegepas word, sal help dat daar meer gereeld ‘n vissie vir die pan beskikbaar sal wees. Ek moet egter in gedagte hou dat spasie beperk is, so ek sal dit “kortpad” moet vat.

Die heel eerste feit is om die weer en die gepaardgaande watertoestande in berekening  te bring. En dis makliker gesê as gedaan. Om hiertoe in staat te wees vat baie ondervinding en wysheid. En steeds lyk dit my moet jy as‘t ware gebore wees met hierdie gawe! Die volgende item  wat sommer baie belangrik is, is  --  aas!

Kortweg gestel, hoe groter die verskeidenheid, hoe “gelukkiger” raak jy. Met ‘n boot is die keuse redelik eenvoudig. Indien jy toegerus is met visaas (hoe varser, hoe beter), rooiaas, witmossel en tjokka behoort jy jou ding te kan doen. Met strandhengel verskil die storie so effe. Hier moet jy verkieslik hê wurm, krewels, visaas, rooiaas (vars, vrot en rypgemaakte), asook witmossel (gesout en vars, wanneer  jy  byvoorbeeld agter galjoen se kind aan is).

Nog iets  baie belangriks is dat jou hengelgerei geskik moet wees vir die tipe vis wat jy in die oog het en die samestelling van stok, lyn en hoeke, ensovoorts moet deeglik in gedagte gehou word.

Tegniek is iets wat met die tyd sal kom, maar jy kan sake vergemaklik deur by iemand raad te gaan vra en jy hoef nie verder te soek as ‘n Hardebaard nie. By hom, of haar, sal jy leer van goed soos hoe die water moet lyk  vir sekere visse en dan sommer ook hoe jy die ase moet voorberei en aanheg. Jy sal dan ook weet hoe om sloepe te identifiseer en wanneer om vir dwarssloepe (soos byvoorbeeld vir witsteenbras) te soek. Dan gaan daar ook tye wees dat jy verskillende ase aan dieselfde hoek heg en hoe moet jy die spul vasbind?

Die verwysing na die baie ase sal jou dalk skeef laat kyk, want dit kos nogal om die lot bymekaar te bring, maar ek het nie gesê dit sal maklik wees nie, net beter!

My spasie is op, kom ons kyk hoe dit gaan.

Groete, Seemeeu

Zoom