R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
Verlede week se stormwind het oral vernietigende spore agtergelaat, ook by BARC (Birkenhead Animal Rescue Center) se hondehokke.
“Vyf hokke se dakke is afgewaai, maar ons is dankbaar dat geen van die diere seergekry het nie,” het ‘n geskokte Annalie Jonker van BARC gesê. “Ons kon daarin slaag om die honde vinnig in ander hokke te kry, of saam met ander honde te plaas.”
Sy sê die hokke is in elk geval nou so vol dat daar in sommige hokke tot 3 honde bymekaar is.
Van die groot dakplate wat hulle vir die nuwe aanbouings gekry het, het ook begin rondwaai.
In ‘n stadium was hulle bevrees dat die kantoor, waarin onder andere baie medikasie gestoor word, ook sou omwaai. “Die ervaring tussen die hokke, dakplate wat rondwaai en die honde wat paniekbevange geraak het, was absoluut vreesaanjaend”.
Vera Swart het hulp vir Nols Jonas, BARC se Veldwagter en Hannelie Jonas via Facebook gevra.
Binne ‘n uur was Samantha Thompson, Martin Butler en ‘n paar jongmanne by die hokke om te help. Samantha is ook deurgaans behulpsaam met die rehabilitering van die honde wat soms erg getraumatiseer is. “Sy tree soos ‘n ware ‘Dog Whisperer’ op soos wat sy met die diere kommunikeer,” vertel Annalie.
Annalie sê die dag nà die storm het Johan Strydom en van sy werkers die dakplate wat afgewaai het, gratis kom vasslaan.
‘n Gebaar waarvoor sy opreg dankbaar was.
Sy het haar opregte waardering teenoor al die vrywillige helpers uitgespreek en gesê sy, Nols en Hannelie sou magteloos gewees het sonder almal se hulp.
