R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
Die nood vir Portugese Bybels in Angola is so hoog dat dit Fanie Bothma, sakeman van Gansbaai, ‘n ver pad laat loop het voordat hy met sy vakansieplanne saam met vriende na Angola voortgegaan het.
“Ons eerste dorp waar ons in Angola gaan aandoen, is Menongue,” vertel Fanie. “Daar is ‘n sendeling wat vir Operasie Mobilisasie by ‘n sendingstasie werk, Wessel van der Merwe, ‘n Suid-Afrikaner, by wie ons en ons vriende gaan oornag.”
Fanie het van die geweldige skaarste aan Portugese Bybels gehoor en besluit om vir eers al die beplanning bietjie agteruit te skuif en Portugese Bybels te soek om saam te neem.
Ds Dirk van Dyk van Gansbaai NG-gemeente het kontakbesonderhede van die Bybelgenootskap, asook Christian Publications, aan Fanie verskaf.
“Die Bybelgenootskap kon ons van 20 Bybels in Portugees voorsien en ons het al 20 gekoop,” vertel Fanie. “Daarna is ons na Christian Publications, waar ek vir Charlotte Elliott ontmoet het, ‘n grootse en wonderlike vrou met absolute vertroue op die Here se voorsiening.”
Fanie vertel dat Charlotte en haar man van Ierland afkomstig is en dat hulle geroepe gevoel het om in Afrika vir Christus te kom werk. Hulle was in hul twintigerjare toe hulle 60 jaar gelede na Suid-Afrika gekom het.
In die Kaap het hulle saam met ‘n man gewerk wat geestelike traktaatjies, brosjures en pamflette gedruk en versprei het.
Charlotte het vertel dat hulle destyds alle drukwerk op primitiewe drukmasjiene gedoen het en dan die traktaatjies met ‘n gewone broodmes van mekaar gesny het.
‘n Onbekende Amerikaner het later vir hulle ‘n drukpers gekoop. ‘n Erf is in Belville gekoop en iemand het sy besigheid verkoop om hulle te help. Sodoende kon ‘n stoor gebou word.
Charlotte se man is sowat 6 maande gelede oorlede en sy werk alleen saam met 2 helpers.
Fanie vertel dat sy al baie oud is en moeilik loop, maar dat sy aanhou om moedig te vertrou dat die Here sal voorsien om met die drukwerk voort te gaan.
Sy het ‘n groot hoeveelheid Portugese drukwerk aan Fanie voorsien om saam op hulle tog na Angola te neem. Sy wou geen geld daarvoor aanvaar nie en net gesê: “He will provide”, terwyl sy met haar vinger na Bo gewys het.
“Ons het toe besluit om donasies aan haar te stuur,” sê Fanie. “Dit is net aangrypend hoe Charlotte steeds die drukkery aan die gang hou sonder enige vaste inkomste met bloot haar geloof dat die Here sal voorsien, en Hy voorsien al vir baie jare.”
Fanie is daarvan oortuig dat iemand soos Charlotte ondersteuning verdien.
Fanie vertel dat hulle, soos vele ander Suid-Afrikaners lief is vir die buitelewe.
“Daarom gaan ons gereeld in tente kamp en onderneem graag 4x4 toere oor die grense in Afrika,” sê hy. “Vanjaar is dit die eerste keer dat ons as ‘n groep Angola vir sowat 5 tot 6 weke gaan aanpak.” Vanjaar se groep wat met 3 voertuie die tog neem, is Fanie en Judy Bothma, Johan en Elcine Hulme en Ben en Ina Gericke.
“Behalwe vir die fantastiese avontuurvakansie in Angola, sien ek veral daarna uit om al die Portugese drukwerk en Bybels daar te kan oorhandig en ek vertrou dat dit met oorgawe benut sal word,” sê Fanie.
