R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
Gansbaai word gekenmerk deur ‘n gemeenskap wat saamstaan wanneer die nood druk.
Die nood by een van ons dorp se geliefde inwoners druk swaar en geen mens vra maklik om hulp nie.
Voor my sit ‘n jong man. Sy naam as uitstekende fotograaf, het hom vooruitgeloop nog voordat ek na Gansbaai verhuis het. Ek het hom leer ken deur sy uitsonderlike foto’s op Facebook, later deur ‘n koerantberig waar hy ‘n toekenning ontvang het vir goeie werk by sy voldagpos en later by Gansbaai se buurtwag, waar hy kosbare tyd opoffer om ons dorp vry te hou van misdaad .
Ek het hom al ‘n paar keer by vergaderings gemaan: “Gaan huis toe, jy is jonk getroud. Moenie jou bruid afskeep nie.”
Hugh-Daniel Grobler is ‘n vegter. Hy het hom nog nooit laat onderkry nie.
Hy het arm groot geword, sy pa op ‘n jong ouderdom verloor en hy het homself belowe dat sy gesin nooit sou swaarkry nie…”, maar sy ma, Denise is terminaal siek - en die groot K, die ewige dialise en om sy ma so te sien – dit kry hom onder – en nou die rekenings wat net ophoop…
“Ek doen hierdie noodroep ter wille van my ma. Ek het 2 keuses – of ek vra hulp, of ek laat alle behandeling staak en laat haar sterf – en dit is ek nie naastenby van plan om te doen nie. Dit is nie in my aard om op te gee nie en ek sal enigiets vir my ma doen. Sy sou dit ook vir my gedoen het. Ek is nie gereed of van plan om haar nou al te laat gaan nie,” sê die vasberade jong man, wat Dinsdagoggend voor my sit.
Hy is by die werk afgeboek weens ‘n besering wat hy opgedoen het toe hy ‘n fietsdief gevang het.
Ek het Hugh-Daniel gevra om kantoor toe te kom, nadat ons al ‘n tydjie gelede bymekaar gekom het om sy finansiële krisis aan te spreek. Dit is moeilik om mense in die oë te kyk vir hulp.
Hugh-Daniel vertel: “Twee jaar gelede het ons die nuus ontvang dat my ma kroniese nierversaking het. Ons het dadelik begin geld bymekaar maak om haar op ‘n mediese fonds te registreer, wat ons ook reggekry het.
Geen staatshospitaal of staatsinstelling in die Wes-Kaap kon ons help met dialisebehandeling nie. Dr Geoff Biel van Kaapse Wynlande Niersentrum het aangebied om 6 maande se dialise te skenk totdat die mediese fonds in werking sou tree.
Dit was ‘n moeilike 2 jaar vir my ma en almal wat by haar betrokke was. Sy het verskeie infeksies opgedoen en haar immuniteit was laag. Ek het lateraan tred verloor met die aantal kere wat sy in die hospitaal opgeneem is – en elke keer was daar onvoorsiene uitgawes wat nie deur die mediese fonds gedek word nie.
Sowat 3 maande gelede het ons die skoknuus ontvang dat my ma boonop met kanker gediagnoseer is. Sy moes onmiddellik met chemoterapie begin ter wille van ‘n kans op herstel.
Op die oomblik maak die dubbele behandeling haar verskriklik siek en moeg.
Ek het reeds soveel organisasies om hulp genader, maar niks gebeur vinnig nie.
‘n Amerikaanse vriendin met ‘n huis in De Kelders, het Denise se verhaal op ‘A caring bridge campaign – Go Fund Me’ geregistreer, maar intussen loop die tyd uit.
Gemeenskapsprojek
Hugh-Daniel stel ‘n afdruk beskikbaar van een van sy uitmuntende foto’s om by te dra tot sy ma se behandeling en agterstallige mediese koste.
Donateurs word genooi om ‘n skenking van minstens R250 te maak en ‘n kans te staan om hierdie landskap van Gansbaai te wen. ‘n Gelukkige wenner se kaartjie sal getrek word sodra die R50 000 merk bereik word.
Kom vat hande met hierdie talentvolle jong man en maak ‘n skenking. Kleiner bedrae is ook welkom, maar dit sal nie in ag geneem word vir die prystrekking nie.
Maak jou inbetaling by die onderstaande rekening en epos die bewys van betaling na jgrobler505@gmail.com. Die trekking sal tydens ‘n openbare geleentheid plaasvind. Die tyd, plek en datum sal in die Gansbaai Courant bekend gemaak word.
Die bankbesonderhede is:
J Grobler, ABSA Trusave account, bankrekeningnr.: 930 685 1506, Takkode – 632005
Let wel: Daar is ook ‘n veiling aan die gang van ‘n geraamde foto van Hugh-Daniel wat op verskeie Facebook-blaaie verskyn. Dit is ‘n afsonderlike insameling van geld vir dieselfde doel. Ondersteun gerus albei fondsinsamelings.
