Oor die afgelope tyd is daar 'n toename in die misbruik van snuifmiddels onder jong kinders in die Overstrand.

Ouers en onderwysers moet waaksaam wees, aangesien dit ‘n kommerwekkende tendens word. Breinskade kan plaasvind binne 6 maande na die aanvang  van die  misbruik. 

Wat is ‘n snuifmiddel?

Snuifmiddels sluit in chemikalieë wat gevind word in produkte soos spuitkannetjies, skoonmaakmiddels, gom, verf, verfverdunner, naellakverwyderaar, amyl nitraat,  aanstekergas en meer.  Dit word gesnuif of gehyg om dronk of hoog te voel.

Die middels kan in ‘n plastieksak gespuit, in ‘n bottel gegooi of in ‘n lap of mou geweek word voordat dit ingeasem of gesnuif word. Die middels het psigoaktiewe (gedagte veranderende)  eienskappe wanneer dit ingeasem of gesnuif word.

Nuwe gebruikers tussen die ouderdom van 9-14 jaar misbruik veral gom, skoenpolitoer, spuitverf, petrol en aanstekergas.

Nuwe gebruikers tussen die ouderdom van 15-17 jaar misbruik meestal 'n tipe nitriet snuifmiddel, bekend as amielnitriet, metamfetamien (TIK) of  kapsule amielnitriet (poppers).

Daar is nie ‘n veilige vlak van dwelmverbruik nie.

Toestande kan wissel afhangende van die "baksel" of mengsel en aangesien snuifmiddels nie gesien word as dwelms nie, gebeur dit dat misbruik alreeds op ‘n gevorderde stadium is wanneer die probleem geïdentifiseer word.

Hierdie tipe dwelm is vryelik beskikbaar, goedkoop en die gevolg dodelik – net soos ander dwelmmiddels. 

Zoom