“Jy moet vinnig hierheen kom, ek en Chantelle is besig om ‘n baba op ‘n motor se agtersitplek te vang,” het Cassie Carstens van Overstrand Medical Response se stem op Donderdagaand, 2 Julie 2015 om 21:30 benoud oor die foon gekom.

Met Gansbaai Courant se aankoms voor Cassie’hulle se woning, is die moeder, Veronica Snyders (28), haar lewensmaat, Nigel Frans (34) en die half-uur oue pasgebore baba almal op die agtersitplek van die gesin se motor gekry, met Riaan Buys wat die drip sommer bokant die motor se dak staan en houvas. Cassie Carstens en Chantelle Buys-Carstens, ook van Overstrand Medical Response, het die baba gevang. 

“Dit was omtrent my ‘duisendste’ baba wat ek gevang het, maar nog nooit op ‘n motor se agtersitplek nie,” het Cassie gesê. “Maar dit was gelukkig ‘n baie maklike geboorte - dit was net een druk en die baba was daar - perdfris en gesond.” Dit was Chantelle se eerste baba wat sy help vang het en “dit was ‘n hele belewenis,” het sy gesê. “As dit is hoe dit gebeur, wil ek eerder nie ‘n normale geboorte hê nie!” Nigel vertel hy kon aan niks anders dink as om na Overstrand Medical Response te jaag nie, aangesien daar nie tyd was om oor enige ander plek te wonder nie. Die nuweling is hulle eerste dogter en hulle is sommer baie trots op haar. “Dis nog te vinnig om aan ‘n naam te dink, ek is net dankbaar vir die hulp wat ons ontvang het en dat alles goed afgeloop het,” het ‘n flouerige Veronica gesê.

Hardus Botha

Zoom

Zoom