Gansbaai SAPD se sers Groenewald, sers Marais en konst Meyer het op 10 Julie 2015 nagpatrolliediens agter Eluxolweni gedoen. Hulle was op die uitkyk vir moontlike inbrekers in ‘n voetpaadjie vanaf Broadwaystraat in Pearly Beach na Eluxolweni. Op 11 Julie om 01:40 het hulle ‘n lig deur die bosse gewaar wat in hulle rigting op pad was. “Die persoon wat voor gestap het, het aan die einde van die voetpaadjie sowat 5 meter vanaf die SAPD-lede tot stilstand gekom,” sê Ad.Off. Wynand le Roux, woordvoerder van Gansbaai SAPD. “Hulle het hom gegryp en vir die besit van vermeende gesteelde goedere, die besit van ‘n gevaarlike wapen en verset teen arrestasie gearresteer.” Hy sê die tweede persoon het omgedraai en deur die bosse in die rigting van die voetpaadjie begin weghardloop. Sers Marais is agterna, met sers Groenewald wat gevolg het, nadat hy konst Meyer met die eerste persoon gehelp het. Sers Marais en sers Groenewald het daarin geslaag om die persoon in te hardloop en hom probeer arresteer. “Hy het sers Groenewald aan sy duim gebyt en daarna ‘n mes uitgepluk om sers Marais te steek,” sê AO Le Roux. “Laasgenoemde het die messteek met sy arm geblok en kon daarin slaag om die mes af te neem.” Die persoon is daarna ook gearresteer vir die besit van vermeende gesteelde goedere, die besit van ‘n gevaarlike wapen, verset teen arrestasie, aanval op sers Groenewald en poging tot moord op sers Marais. Sers Groenewald het wel mediese behandeling ontvang, maar nie een van hulle het ernstige beserings opgedoen nie. Die twee verdagtes van Eluxolweni het reeds in die Bredasdorphof verskyn en is tans in aanhouding te Buffeljachts totdat hulle in die hof moet verskyn. Voorwaar dapper optrede deur die drie SAPD-lede gedurende middernagtelike ure.

Hardus Botha

Zoom