Kategorie: Sielkundige riller

ISBN: 978-0-7993-7582-4

Monstersaad is ’n ryklik geskakeerde, veelvlakkige sielkundige riller. Daar is verskeie storielyne wat deurmekaar loop.

Renata Malan is ’n forensiese sielkundige, die erfgenaam van ’n man wat haar as proefkonyn gebruik het. Haar biologiese pa is ’n veroordeelde reeksmoor-denaar.

Renata gaan studeer dus sielkunde om haarself te verstaan, net om te leer dat sy dit nooit op haar eie sal regkry nie.

Sy leer wel heelwat van kriminele en hulle denkpatrone – stam sy nie immers af van ’n berugte moordenaar nie?

Wanneer ons Renata leer ken, is sy ’n vennoot in Malan en Coetsee Privaatondersoeke. Hulle word genader om die skynbare selfmoord van ’n sewentienjarige meisie, Melissa Verhoef, te ondersoek. Aanvanklik dink Renate hulle mors tyd en geld – die kind het inderdaad selfmoord gepleeg. Dan kyk sy dieper en besef alles is nie so eenvoudig soos dit lyk nie.

Soos Renata dieper delf in Melissa Verhoef se dood, krap sy ook rowe in haar eie gemoed af.

Sy bloei teen die einde van die boek, op vele maniere.

Dit is uiteindelik ’n donker boek hierdie, maar daar is ongetwyfeld hoop teen die einde.

Die skrywer en kritikus, Alta Cloete, sê oor Madelein Rust se debuut, Die 13de kaart: “Die verhaal lewe met ’n hele aantal interessante, oortuigende newekarakters wat menslikheid en egtheid in die milieu van wreedheid en moord indra.”

Hierdie tweede boek beloof om veel meer vir Madelein Rust se loopbaan te beteken as haar debuut.

Zoom

Zoom