Stropery voer steeds hooggety en 'n groepering van Masakhane is veral baie bedrywig.

Volgens 'n ingeligte bron stroom daar ook steeds nog stropers vanaf die Oos-Kaap hierheen. Klagtes word gereeld van Franskraal en Kleinbaai inwoners ontvang oor stropers wat oop en bloot met hul duiktoerusting by huis verbyloop en die see ingaan. Die gebied vanaf Gansbaai se Nuwe Hawe, wat Pearly Beach insluit, is 'n verbode duikgebied en niemand mag enige duiktoerusting daar teen die kus in hul besit hê nie. Hieraan steur die stropers hulle egter glad nie en Mariene en Kusbestuur is onderbeman en kan baie keer nie dadelik op inwoners se oproepe reageer nie.

Die Waarnemende Hoof van Gansbaai se marienegebied, Hoofinspekteur Leon Le Roux, doen egter 'n beroep op die publiek om steeds verdagte stropery te rapporteer. Die Bevelsentrum in Hermanus kan by 028-313-2703 geskakel word.

Verlede Woensdag is 'n verdagte voertuig by Danger Point Skiereiland opgemerk waarna 'n wilde jaagtog tot selfs in Masakhane gevolg het. Die bakkie is later daar voorgekeer en die bestuurder gearresteer. Sy helpers en duikers het egter tydens die jaagtog óf van die bakkie afgeval òf afgespring. Daar was geen perlemoen op die bakkie nie, maar 930 ontskulpte diere is by die oplaaipunt by Danger Point gevind. 'n Duiker is ook daar gearresteer. 'n Verdere 1629 perlemoen is dieselfde oggend by Blou Baai in Pearly Beach verlate gevind.

Francois de Jongh

Zoom