Olga Swanepoel, bekende in Kwilt- en Skilderkunskringe in Gansbaai, het op Saterdag, 17 Oktober haar 80ste verjaardag (die volgende dag) in o.m.G.e.e. Bediening se saal gevier.

Linda Kloppers was vir die funksie verantwoordelik en sowat 40 vriendinne van Olga kon gesellig saamkuier. Kyk mens na hierdie lewenslustige en “perdfris” gesonde 80-jarige se lewensgeskiedenis, is daar twee uitstaande woorde: “formidabel” en “bedrywig”. Olga is op 18 Oktober 1935 in Magaliesburg, tussen Pretoria en Johannesburg gebore. Haar pa, Erich Kuschke, was daar die eerste skoolhoof van Bekker Landbou Hoërskool, waar sy ook haar eerste skooljaar deurloop het. Olga matrikuleer in 1952 aan Afrikaans Hoër Meisieskool in Pretoria. Sy verwerf haar Onderwysdiploma in 1996 aan die Onderwys Kollege in Pretoria en in 1996 lê sy haar onderwys-tuig neer. Olga het 5 dogters, Reinette (56), Ronél (54), Erica (52), Benita (50) en Elsabé (40) - “ en dit is waarmee ek myself hoofsaaklik besig gehou het - kinders grootmaak,” vertel sy van haarself, terwyl sy aanvanklik oor veel meer aktiwiteite swyg.

Olga is die trotse ouma van 13 kleinkinders en 4 agterkleinkinders. Naas onderwyser en kinders grootmaak, is enkele ander aktiwiteite behoorlik uit hierdie beskeie dame “uitgetrek”, soos onder andere: Afrigter van hokkie, tennis en swemspanne; ‘n UNISA kursus in Remediërende Onderwys, met naskoolse hulp aan leerders. (Dis net om ‘n paar aspekte te noem) Op 70- en 71-jarige ouderdom neem die sportgeesdriftige Olga aan die Midmar Myl Swem deel en maak elke jaar betyds klaar om ‘n medalje in te palm. Na haar aftrede begin sy in 2000 om te skilder en in 2008 stig sy haar bekende Kwaskenades, met vele kunsstudente wat sy al opgelei het.

Intussen het sy in 2004 met haar bekende kwilt-aktiwiteite begin. “Van skilderkuns en kwiltwerk gepraat, kan gerus kennis geneem word van die uitstekende kwiltuitstalling in die Hermanus NG Kerk eerskomende naweek (23-25 Oktober), asook ons Ubuntu kunsuitstalling in Gansbaai Toerisme se saal vanaf 14 tot 19 Desember 2015, wat besonders gaan wees,” vertel ‘n opgewonde Olga. Sy sê Ubuntu is ‘n Zoeloe-woord wat “meelewing, respek, broederliefde, deernis en empatie beteken en al die skilderye in Desember se uitstalling sal Ubuntu as tema voorstel. “Wat maak vir Gansbaai lekker? - sy mense! En as ons almal ‘Ubuntu’ nastreef, sal dit ‘n nog meer wonderlike plek wees om in te woon en werk,” het Olga gesê. Sy vertel ook van ‘n onlangse en merkwaardige belewenis.

Die Bekker Landbou Hoërskool waarna hierbo verwys is, het ook vanjaar gedurende September hul 80ste gedenkjaar gevier - saam met haar eie 80ste jaar. Drie van die 4 gesinslede (een is oorlede) is na soveel jare opgespoor en hulle het nie twee keer gedink om daarheen te vlieg nie. Voor haar vertrek daarheen het sy spesiaal ‘n pragtige kwilt-muurbehansel van die skoolwapen as ‘n verjaardaggeskenk aan die skool gemaak, wat sy aan die skoolhoof oorhandig het.

Merkwaardig - haar eie 80ste verjaardagviering saam met haar eerste skool se 80ste feesvieringe! Intussen gaan Olga rustig voort met haar kwilt- en skilderkuns aktiwiteite, waar se selfversorgend in haar woning met ‘n pragtige en netjiese tuin woon.

Hardus Botha

Zoom

Zoom