Tydens ‘n persoonlike besoek deur die Minister van Vervoer en Openbare Werke, mnr Donald Grant aan Gansbaai op Maandag, 26 Oktober 2015, was om die nuwe skool in Masakhane wat in aanbou is, te besoek. Die primêre rede vir hierdie besoek was om, tesame met tegniese personeel, asook die argitek, ondersoek in te stel na etlike strukturele probleme wat gerapporteer is. ‘n Onaf-hanklike ondersoek deur deskundiges het  bevind dat daar etlike probleme met die tegniese ontwerp van die gebou is wat ‘n veiligheidsrisiko in die toekoms kan wees.  Die minister is vergesel deur die DA Provinsiale Parlementslid, mnr Masizole Mnqasela, Raadslid Riana de Coning en mnr Kat Myburgh, Areabestuurder van die Overstrandse Munisipaliteit se Gansbaai Administrasie, asook ander belanghebbendes en gemeenskapsleiers.

In die ondersoekverslag is onder andere kommer uitgespreek oor die strukture wat die rekenaarsentrum, enorme skoolsaal, ablusieblokke en Graad R klasse insluit. Hierdie geboue het almal ‘n betonblad as dakstruktuur en krake in sommige van die geboue was ‘n duidelike aanduiding dat iets skort. Dit was duidelik dat die probleem nie aan die gehalte van die bouwerk óf materiaal te wyte is nie en derhalwe kan remediërende stappe geneem word om die strukture te versterk. Die implikasie hiervan is dat die voltooiing van die projek met minstens 6 maande verleng is. Die argitek van die Masakhane-laerskoolprojek, mnr Liam Thiel, het met stawende dokumentasie die strukturele probleme, oorsake daarvan en wat daaromtrent gedoen gaan word, breedvoerig aan die minister en teenwoordigers verduidelik. Daarna is die groep na die probleem-areas geneem, waar die strukturele probleme aan hulle uitgewys is. “Dit is egter prysenswaardig dat die probleme betyds gerapporteer is en dat regstellende aksies summier geneem is, asook dat belanghebbende partye ten volle op hoogte van sake gehou is,” het rdl De Coning gesê. “Indien daar gelet word op die pragtige en uiters moderne ontwerp van die skool, is die 6 maande vertraging ‘n klein prys om te betaal vir die uitstekende fasiliteite wat aangewend sal kan word.” Op sy beurt het mnr Myburgh dit ook beklemtoon dat die skool absuluut en sonder twyfel ‘n moderne skool is en ‘n groot aanwins vir die gemeenskap is. “Die uitstel met die finalisering van die geboue met sowat 6 maande of selfs langer, kan nie vergelyk word met die waarde daarvan, óf met die veiligheid van die kinders nie,” het mnr Myburgh gesê. “Daarop doen ek ‘n beroep op die ouers, die gemeenskap en beheerrade om geduldig te wees - dit sal die langer wag die moeite werd maak.” ‘n Verdere positiewe gedagte is die feit dat die Wes-Kaapse regering in geen opsig die probleme geïgnoreer het of enigsins probeer verdoesel nie, terwyl die gemeenskap ook op hoogte van sake gehou is, met 'n  duidelike boodskap: die belange en veiligheid van die leerders word vooropgestel.

Hardus Botha

Zoom

Zoom