Op 27 Oktober 2015 het Franskraal Rolbalklub 'n ope toernooi vir spanne wat bestaan uit 3 dames aangebied. 

Die getal inskrywings moes beperk word weens die opgradering van die A-perk, maar die B-perk was ten volle benut deur 14 spanne wat ingeskryf het, nl. 4 elk van L’Agulhas en Hermanus en 6 van Franskraal.  Dit was nogal 'n kleurvolle gesig aangesien die dames almal pienk hemde gedra het om hulle ondersteuning vir kankernavorsing te toon.  Die weer het mooi saamgespeel en na al die voorafgaande onweersdae was die weer eintlik baie goed en het die spelers die dag regtig geniet.

Me Christie Groenewald het die dag geborg soos sy reeds baie jare doen.  Sy kon egter weens persoonlike omstandighede nie teenwoordig wees nie, maar het haar goeie wense telefonies oorgedra. Franskraal Rolbalklub is dankbaar vir haar voorgesette ondersteuning.  Soos tydens elke vorige damesdag was die mans van die klub op hulle stukke om die dames te bederf met 'n aantreklike en smaaklike middagete en ander versnaperings. Die kroegmanne het ook gesorg dat die dames nie dors word nie.  Al die reëlings wat deur so 'n toernooi nodig is, is op voortreflike wyse deur die verantwoordelike mans getref en die dag het glad verloop.

Nadat 'n aantal kleiner pryse uitgedeel is, het die Wedstryd-sekretaris die wenners onder van die volgende skippers aangekondig, nl.

3de plek – Amanda Meyer – Hermanus

2de plek – Rosa Cloete – Hermanus

1ste plek – Ina Trollip – L’Agulhas

Dankie aan al die deelnemers. 

Volgende jaar maak ons weer so!

Pieter Conradie, President, Foto verskaf

Zoom