R43 Padgebruikers Kla: Padmakers Moet Spoed V...
Gansbaai Courant het heelwat klagtes van padgebruikers ontvang dat die R43-pad tussen Stanford en Gansbaai onveilig is.
Vanjaar se betowerende NGK-Kerssang-diens is sommer in tweevoud aangebied. Eers was dit die Jeug- en Gesins Kerssangdiens op Sondag, 15 November wat vir die eerste keer aangebied is, met die kerkgebou wat pragtig deur hulself versier is. Hierdie was ‘n inisiatief van die NG Jeugkommissie onder leiding van Hannes Cilliers en die doel daarvan was om die jeug voluit te betrek. Pikkie Louw (orrelis) het ‘n puik program vir die jeug saamgestel.
Naas hartlike gemeentesang, was van die ander deelnemers Laerskool Okkie Smuts Marimba Orkes, Laerskool Gansbaai Junior- en Intersen Fase, Gansbaai NG Kerkkoor, Kleine Gansies, Fiona Fourie, Monet van Deventer en Alissa Coetzee, met Conrad Geldenhuys as knap program-aanbieder. Na afloop van die Kerssangdiens is daar gesellig in ‘n volgepakte Pretoriussaal saamgekuier en verversings geniet.
(Jeugdiensfoto’s: Hennie Prinsloo en Maureen Voigt)
NGK Kerssangdiens
Hierdie jaarlikse Kerssangdiens onder leiding van Aletta Lochner op Sondag, 22 November in ‘n prag-versierde kerkgebou was weer eens ‘n belewenis om te kon bywoon. Die NG Kerkkoor met Aletta Lochner as koorleier en Annaline Reinke as orrel- en klavierbegeleier, se puik koorsang het soos altyd ‘n ware Christusfees atmosfeer geskep. Aletta was ook verantwoordelik vir die samestelling van ‘n uitstekende program. Jack White met sy bekende trompetgeskal het weer deelgeneem, asook Chris van Zyl met sy kitaar.
Die VGK Koor, asook die Blompark Mannekoor onder leiding van hul afrigter, Annelie Botha, het eweneens uitstekend met hul pragtige sang sonder enige begeleiding bygedra tot ‘n geestelike atmosfeer. Ds Willie Kotze het die voorlesings, hoofsaaklik op die Lukas Evangelie gebaseer, afwisselend saam met verruklike koor- en gemeentesang hanteer. Tydens die sing van “Met Middernag” en “Stille Nag” het etlike lidmate met brandende kerse in rooi houers na vore gestap, met altwee die kore se lede wat soortgelyke kerse opgesteek het. Met die ligte wat afgeskakel is, is opgemerk hoe vele trane stilweg afgevee word. Ook hier is die aand gesellig in ‘n volgepakte Pretoriussaal met verversings afgesluit.
Hardus Botha
