Hennie Groenewald (14), een van die Birkenhead Boothengelklub se juniors, het onlangs ‘n “rare” vis vir hierdie omgewing gevang. Die vis is aan die binnekant van die nuwe hawemuur met ‘n “spinner” (Lepelvormige metaal met ‘n hoek) as aas gevang en het 1.56kg geweeg.  Iemand het vir hom gesê dit is ‘n Greenspot Kingfish, maar dit is onomwonde as ‘n langvin-geelstert of longfin yellowtail (Seriola rivoliana) geïdentifiseer.

Gansbaai Courant het by gesoute hengelaars navraag oor die korrekte spesienaam gedoen. Albert Potgieter se boek, Gids tot Algemene Seevisse van Suider Afrika (Rudi van der Els) het die uitkenning maklik gemaak. Bevestigende antwoorde dat dit nie ‘n Kingfish-spesie is nie, is ook van Phillip Fourie (Voorsitter: Birkenhead Boothengelklub) en Philip Fourie (Kaptein: Pearly Beach Rots- en Strandhengelklub) ontvang (baie dankie!).

“Hierdie vis kom eintlik slegs vanaf  Knysna Noordwaarts voor, maar met die buitengewone warm water wat onlangs ervaar is, is dit heel moontlik dat dit by uitsondering in ons area kon voorkom,” het Phillip (Birkenhead) gesê. “Dit staan soms bekend as ‘n ‘Almaco Jack’ en is nie ‘n Kingfish nie, aangesien alle Kingfish-spesies prominente dubbel rugvinne het.” Dit is ook deur Philip (Pearly Beach) bevestig. Dit is ook bevestig dat die langvin-geelstert met spinners (lepelvormige metaalkunsaas) gevang word en dit is ook waarmee Hennie sy “rare” vis gevang het.

Opgesomde inligting oor die langvin-geelstert uit bogenoemde boek, dui op die volgende: Die algemene liggaamskleur is silwerig-olyfgroen van bo met ligter sye en bykans ‘n wit penskant. ‘n Duidelike kenmerk is ‘n donkerbaan oor die “skof” soos ‘n nekstreep (wat Hennie se vis ook gehad het). Die vis is in geheel met baie klein skubbe bedek. Dit is ‘n redelik algemene roofvis in tropiese en warm water en is ewe tuis in die oop see as by koraal- en rotsriwwe en maak jag op kleiner vissoorte. Die spesie word meestal met kunsaas wat gesleep word gevang. Die wêreld-hengelrekord is 59.9kg en die Suid-Afrikaanse hengelrekord is 15.8kg.

Hardus Botha

Zoom