“10 jaar gelede, in 2005, het ek besluit om jaarliks ‘n gesellige “Oumadag” in my huis aan te bied,” het Baby (Johanna) Krüger (77) verlede jaar Juniemaand gesê. “Nou is dit 2015 en 10 jaar later en dit was my laaste jaar om ‘n Oumadag aan te bied.” Die tema van 2015 se laaste Oumadag was “Cow Girls” en dis presies hoe die sowat 25 op-en-wakker ouma’s aangetrek het - pure “Cow Girls”. Nou is dit 2016 en weer eens naby aan Juniemaand, maar in die plek van ‘n Oumadag, verhuis Baby eerskomende Saterdag, 30 April. “Ek moes afkom met my huis se prys, aangesien die kinders gesê het hulle teken as ek nie wil teken nie!” vertel sy. Haar twee getroude seuns, Julian en Rudi Krüger van Stellenbosch het eenvoudig voet neergesit en besluit dit is tyd vir hulle ma om nader aan hulle te kom bly. Na 11 jaar in De Kelders met 10 jaar se Oumadag-aanbiedinge agter die rug, is haar huis in De Kelders nou verkoop en het sy ‘n “klein huisie” in die Strand gekoop. “Ek gaan eers vir ‘n tydjie by my seun bly, aangesien daar bietjie restoureerwerk aan my Strandhuis is wat eers gedoen moet word.” Baby sê sy was baie gelukkig in De Kelders en het voluit hier geleef, maar sy sien daarna uit om nader aan haar seuns en hul gesinne te gaan woon, wat 5 kleinkinders en 1 agterkleinkind insluit. “Ek groet graag al my wonderlike vriende en ook baie spesiaal my bure en ek gaan almal beslis baie mis,” is Baby se afskeidswoorde.

Hardus Botha

Zoom