“Tydens die deursoek van die dwelmhuis in Masakhane, na aanleiding van verlede week se huisroof en skietvoorval, waar vyf persone gearresteer is, het ons gehoop om die .38 rewolwer en skootrekenaar op te spoor, maar slegs dagga is gekry,” sê Sp.Kapt Danie Rautenbach. “Een van die verdagtes wat gearresteer is, is wel met die huisroof en skietvoorval verbind.”

Tydens ‘n opvolgondersoek, na aanleiding van die arrestasies, is die ondersoekbeamptes na nog ‘n huis in Masakhane geneem, van ‘n vriend van een van die wat gearresteer is. Die .38 rewolwer, vier .38 rondtes en die skootrekenaar is toe wel daar gevind. ‘n Gat is in die binnekant van die vriend se huis in die muur gegrawe, waar genoemde items sonder die medewete van die huiseienaar versteek en toegemaak is. Naas hierdie items is die rugsak en kleiner elektroniese goed ook gevind. “Ek bedank graag vir AO Vermeulen, sers Tsoanayana, konst Pieterse en konst Mpando vir hulle flink optrede en speurwerk wat hierdie saak so vinnig na ‘n punt gedryf het,” sê Sp.Kapt Rautenbach. Gansbaai Courant het verlede week berig van ‘n huisroof in Kusweg en ‘n skietvoorval langs Blompark se sportgronde (Gansbaai Courant, Donderdag, 19 Mei 2016). Flink optrede en vernuftige ondersoeke het daartoe gelei dat die twee voorvalle met mekaar verbind word, met arrestasies wat wel gevolg het. Die ondersoek duur voort.

Hardus Botha

Zoom