“Ek was omstreeks 05:30 in my kamer besig om my baba te borsvoed en die volgende oomblik staan daar ‘n man in sy sokkies in die deur na my en kyk,” vertel ‘n erg getraumatiseerde Elwida Damons (24) van Blompark. “Hy het niks gesê nie, net na my gestaar, waarna ek aanhoudend om hulp na my ma geroep het.” Gelukkig vir haar het die man daarna weggehardloop.

Elwida en haar drie maande oue baba, Ezekiel woon by haar ma, Elsa Europa in Blompark, met ‘n vyfjarige seuntjie, Waldie Europa by hulle. Elsa het nog geslaap toe Elwida se gille haar wakker maak. Elsa het dadelik met die trappe van die dubbelverdieping woning afgestorm en die boosdoener het weggehardloop. “Wat my bekommerd maak, is wat sy motief was, aangesien hy duursame items kon gesteel het sonder dat ons iets sou agterkom, maar hy het direk na my kamer op sy sokkies geloop,” het Elwida gesê.

Die verdagte het oor ‘n sementsteenmuur agter die woning met behulp van ‘n plastiekkrat gespring, met sy voetspore wat duidelik op die grond vertoon. Daarna het hy die onderste helfte van die hout-kombuisdeur uitgebreek en toegang tot die kombuis gekry. “Dit was ‘n onbekende bruinman en ek bly steeds bekommerd oor sy motief met die inbraak,” sê Elwida. Gansbaai SAPD is ontbied, alhoewel niks tydens die inbraak gesteel is nie.

Zoom