“Inbrake in die omgewing, veral in Kleinbaai en Franskraal, asook in Pearly Beach, het astronomies toegeneem,” sê Sp Kapt  Danie Rautenbach van Gansbaai SAPS se Speurtak. “Die publiek word weer eens gemaan om uiters versigtig te wees en om verdagtes summier aan te meld.” Hy versoek ook inwoners om, waar van toepassing, reeksnommers van waardevolle artikels neer te skryf en ook om foto’s van onder andere beddegoed, eetgerei en dies meer te neem om vir moontlike uitkennings te bewaar.

‘n Verdere waarskuwing deur Sp Kapt  Rautenbach is dat geen items wat deur verdagte persone óf onder verdagte omstandighede te koop aangebied word, gekoop moet word nie. Sodanige gevalle moet ook aangemeld word, anders kan dit ernstige gevolge vir kopers inhou.

‘n Onlangse voorbeeld hierdie week is waar ‘n verdagte persoon van Blompark aan ‘n woning in Kleinbaai se deur geklop het. Die eienaar het die deur oopgemaak en die persoon het kaal daar gestaan. Die alarm is betyds geaktiveer en die persoon het weggehardloop.

Annalie Jonker, bekende van die Birkenhead Animal Rescue Centre (BARC) en haar lewensmaat, Chris Mayne van Groenberg het ook onder inbrekers deurgeloop. “Gelukkig is niks gesteel nie, maar die skade aan die gebreekte deure en sekuriteitsligte is dalk meer as wat hulle sou kon steel,” vertel sy. “Gelukkig sluit ons saans die slaapkamerdeur en aktiveer die alarm vir die res van die huis, wat dalk ons behoud was.” Die inbrekers het eers die sekuriteitsligte buite vernietig en daarna twee deure gebreek om toegang tot die woning te kon kry. In die woonvertrek het die alarm, wat nie buite met ‘n blou liggie aangedui word nie, afgegaan en hulle het weggehardloop sonder om iets te steel.

Gansbaai SAPD kan by 028-384-0201 vir die aanmelding van klagtes gekontak word, maar die Speurafdeling kan ook op hul bystandslyn by 079-893-9972 geskakel word.

Zoom