‘n Vierjaarlange verhouding wat versuur het, het verlede Dinsdag, 5 Julie 2016, tragies geëindig toe die ma van twee minderjarige kinders deur haar voormalige vriend met ‘n mes gesteek is.

Die 35-jarige vrou van Masakhane wie se naam teen ons ter perse gaan, nog nie gepubliseer kon word nie, was op die betrokke dag te voet op pad na ‘n plaas net buite Masakhane, waar sy werksaam was.

Haar voormalige vriend, ene Manager Mphoselwa (36) het haar vergesel en ‘n woordewisseling het ontstaan, waartydens hy haar na bewering met ‘n mes in die linkerbors gesteek het.

Met die aankoms van noodpersoneel het die vrou nog geleef.  Sy kon egter nie praat nie en is kort daarna oorlede.

‘n Ooggetuie het die man op die toneel aan speurders uitgewys, waarna die vermeende messteker homself oorgegee het en die mes aan die polisie oorhandig het.  Mphoselwa het Donderdag, 7 Julie in die Hermanus-hof op ‘n klag van moord verskyn.

Die vrou laat twee kinders van sewe en nege jaar na.

Zoom

Zoom