Baie jare terug gaan hierdie maat van my saam see toe met net ons twee aan boord. Wat my eerste opgeval het was sy vreeslike katrol  --  dié het my nog herinner aan ‘n “hubcap”, bietjie oordryf darem, maar nogtans groot. Hy sien toe ek so loer en kom dadelik met ‘n verduideliking vorendag. Hierdie katrolle sê hy is omtrent die populêrste in veral Natal en Durban. En dis ook sy visstok wat hy altyd gebruik het.

Toe hoor ek van die vreeslike seestrome en dat hulle normaalweg kondens-melkblikkies gebruik om die ou swaar sinkers te vorm.

Ek was darem ook nie heeltemal onnosel nie en het so ‘n idee gehad, maar híér, nee ou maat, dink ek, hier gaan dit nie werk nie. Daardie dag vang hy twee groot kabeljoue van oor die twintig kilogram elk.

En die katrol het nie eens ratte nie! En boonop verloor ek mý kabeljou toe die vis met stok en al in die diep water verdwyn.

Intussen het heelwat manne al met hierdie tipe gereedskap ordenlik vis gevang op die boot.

En kyk, hierdie ouens ken van, hoor.

Ek wil graag vertel van Eldo Marais wat ‘n katrol (nog groter as bogenoemde) persent gekry het van Dirk Odendaal, Franskraal.

Ek gaan probeer om dit te beskryf. Soos reeds gemeld, dis gróót. En dit werk op dieselfde prinsiep as die ou “backpedal”-fietse. Om die waarheid te sê kom die meganisme juis uit een van hierdies.

‘n Briek is verkry deur ‘n terugwaartse beweging van die slinger en dit het vir my baie effektief gelyk.

Verder is daar ook nie ratte nie en spoed word bewerkstellig deur die groot deursnee van die katrol.

En dan is dit blykbaar tuisgemaak ook.

Eldo het hierdie katrol nog nie by die water gehad nie maar ek dink hy moet dit liewer bewaar.

Is daar nog elders van hierdie meesterstukke?

Ek wil ook graag vra of daar dalk enigiets vreemds êrens is wat met hengel te doen het. Laat weet gerus. Groete

Seemeeu

Zoom

Zoom