Danie Vermeulen van Gansbaai se Biltong & Nut Corner se verkoopsdame by sy ander biltongwinkel, Pick ‘n Biltong in Hermanus, is verlede Dinsdagmiddag, 8 Oktober met ‘n goedbeplande slenterstreek gevang.
‘n Dame het daar ingestap en aan die verkoopsdame gesê sy kom die R3,200 vir beddegoed wat Danie en sy eggenote, Ansie bestel het, afhaal. Sy het haarself as Jenny van Bed & Linnen Boutique (wat nie bestaan nie) in Somerset-Wes voorgestel. Danie se verkoopsdame het geen kennis van die reëling gedra nie en ook gemeld dat sy slegs R1,900 se kontant op hande het.
Die dame het alle tersaaklike en korrekte feite verskaf, soos dat die Vermeulens van Gansbaai is en dat hulle tans met vakansie is. Sy het haar selfoon uitgehaal en ‘n “oproep” na Danie gemaak. Sy het met hom “gepraat” en enkele normale “opmerkings teenoor hom gemaak” en daarna met hom “bevestig” dat sy die verskuldigde balans sal kom kry wanneer sy die beddegoed bring.
Dit was ‘n slenter-oproep om die verkoopsdame gerus te stel, aangesien Danie nie so ‘n oproep ontvang het nie. Alles het eg voorgekom en die beskikbare R1,900 is aan die dame oorhandig, wat so ewe ‘n ontvangserkenning vir die bedrag geteken het.
Met Danie’hulle se terugkoms by die winkel moes die verkoopsdame uitvind dat sy om die bos gelei is. Die dame het ‘n kopdoek aangehad wat agter oor haar lang hare gehang het en was in ‘n langbroek met ‘n oorhangende bloes geklee. “Die video-opname is deur Pick ‘n Pay beskikbaargestel, maar die opname was eerstens te onduidelik vir uitkenning en tweedens is ek deur die polisie meegedeel dat die bedrag vrywilliglik aan die dame oorhandig is en dat daar geen afdreiging was nie, wat die saak baie bemoeilik,” vertel Danie. “Dit is net duidelik dat die dame eers persoonlike inligting bekom het om die kans te kon vat en ek wil graag dat mense kennis daarvan neem om te alle tye op hul hoede te wees.”
Hardus Botha